Xalq deputatlari Boyovut tumani Kengashi deputati J.Rahmonqulov hamda Favqulodda vaziyatlar boshqarmasi Boyovut tumani bo‘limi mas’ul xodimlari hamkorligida "Navbahor" mahallasida aholi o‘rtasida profilaktik targ‘ibot tadbiri tashkil etildi.

Tadbir davomida yoz mavsumida kanallar va boshqa ochiq suv havzalarida suv sathining ko‘tarilishi natijasida, ayniqsa, voyaga yetmaganlar va yoshlar o‘rtasida cho‘milish holatlarining ko‘payayotgani alohida ta’kidlandi.

Mas’ullar tomonidan ota-onalar bilan suhbatlar o‘tkazilib, farzandlarni nazoratsiz qoldirmaslik, ularning xavfsizligini ta’minlash, ruxsat etilmagan va xavfli hududlarda cho‘milishga yo‘l qo‘ymaslik yuzasidan batafsil tushuntirishlar berildi. Shuningdek, suvda sodir bo‘lishi mumkin bo‘lgan baxtsiz hodisalarning oldini olish, favqulodda vaziyatlarda to‘g‘ri harakat qilish tartibi hamda hayotni asrashga qaratilgan xavfsizlik qoidalari bo‘yicha tavsiyalar yetkazildi.

Targ‘ibot tadbiri davomida fuqarolarga eslatma va ogohlantiruvchi tavsiyalar berilib, yoz mavsumida suv havzalari yaqinida bolalar ustidan doimiy nazoratni kuchaytirish zarurligi ta’kidlandi.