Tinchlik va barqarorlik - muhim masalaBugun dunyo miqyosida geosiyosiy vaziyat murakkablashib, global xavfsizlik va barqaror taraqqiyot masalalari dolzarb ahamiyat kasb etayotgan bir paytda AQShda Tinchlik kengashining birinchi sammiti o‘tkazilishi xalqaro munosabatlar tizimida muhim voqea sifatida namoyon bo‘lmoqda. Ushbu sammit muloqot, o‘zaro ishonch va hamkorlik tamoyillarini mustahkamlashga xizmat qilishi bilan birga, davlatlar o‘rtasidagi strategik sheriklik munosabatlarini yangi mazmun bilan boyitishga qaratilgani bilan yanada ahamiyatlidir. Ayniqsa, ushbu anjuman doirasida O‘zbekiston delegatsiyasining faol ishtiroki mamlakatimizning ochiq, pragmatik va konstruktiv tashqi siyosat yuritish borasidagi izchil sa’y-harakatlarining amaliy ifodasi bo‘ldi. Prezidentimiz Shavkat Mirziyoyevning Tinchlik kengashining birinchi sammitidagi nutqida O‘zbekiston tashqi siyosatda ochiqlik, mintaqaviy hamkorlik va barqarorlik tamoyillariga sodiqligini yana bir bor namoyon etdi. Prezident global va mintaqaviy xavfsizlik masalalariga alohida to‘xtalib, dunyoda vujudga kelayotgan tahdid va xatarlarni bartaraf etishda muloqot va diplomatik yondashuv ustuvor ahamiyatga ega ekanini ta’kidladi. Kelishmovchiliklarni kuch ishlatish yo‘li bilan emas, balki muloqot va o‘zaro ishonch asosida hal etish zarurligi ta’kidlandi.Ushbu pozitsiya O‘zbekistonning so‘nggi yillarda amalga oshirayotgan tinchliksevar va konstruktiv tashqi siyosatiga to‘liq mos keladi. Mamlakatimiz xalqaro munosabatlarda o‘zaro hurmat va tenglik tamoyillarini ilgari surib kelmoqda. Ma’ruzada, ayniqsa, Markaziy Osiyo davlatlari o‘rtasida ishonch va yaxshi qo‘shnichilik munosabatlarini yanada mustahkamlash muhimligi alohida ta’kidlandi. Keyingi yillarda mintaqa mamlakatlari o‘rtasidagi ochiq muloqot va hamkorlik muhiti barqaror iqtisodiy o‘sish va siyosiy barqarorlik uchun mustahkam zamin yaratmoqda. Prezident tomonidan ilgari surilgan aniq tashabbus va amaliy takliflar nutqning mazmun-mohiyatini yanada boyitdi. Ushbu nutq nafaqat umumiy chaqiriqlar bilan cheklanmay, balki real harakatlar dasturini o‘z ichiga olgani bilan ahamiyatlidir. AQShda o‘tkazilayotgan Tinchlik kengashining birinchi sammiti O‘zbekiston uchun siyosiy va iqtisodiy jihatdan muhim ahamiyatga ega. Ushbu anjuman mamlakatimizning xalqaro maydondagi nufuzini mustahkamlash, strategik sheriklar bilan o‘zaro ishonchga asoslangan munosabatlarni yanada chuqurlashtirish va global tinchlik tashabbuslarini ilgari surish imkonini beradi.T.MAMUTOV, Xalq deputatlari Qonliko‘l tumani Kengashi kotibiyati mudiri