Farzandlarimizning sifatli ta’lim olishi, maktablarda zamonaviy, xavfsiz va munosib shart-sharoitlarni yaratish hamda ta’lim muassasalarining moddiy-texnik bazasini mustahkamlash masalalari deputatlik nazoratining muhim yo‘nalishlaridan biridir.

Shu maqsadda xalq deputatlari Surxondaryo viloyat Kengashi deputatlari M.Narbasheva, Sh.Xolliyeva hamda xalq deputatlari Termiz shahar Kengashi raisi, deputat D.Normuradova shahardagi 3-sonli umumta’lim maktabida bo‘lib, nazorat-tahlil tadbirini o‘tkazdilar.

O‘rganish davomida maktabdagi ta’lim jarayonining tashkil etilishi, o‘quv reja va dasturlarining bajarilishi, o‘quvchilar davomati hamda pedagoglarning dars berish samaradorligi tahlil qilindi.

Shuningdek, sinf xonalari, fan kabinetlari, axborot-kutubxona resurs markazi, sport zali hamda o‘quvchilar uchun yaratilgan boshqa shart-sharoitlarning holati bevosita ko‘zdan kechirildi.

Deputatlar maktab rahbariyati bilan suhbat davomida mavjud muammolar, ularni bartaraf etish imkoniyatlari hamda ta’lim sifatini yanada oshirish bo‘yicha zarur chora-tadbirlarni muhokama qildilar.

“Bugun viloyat Kengashi deputatlari bilan birgalikda 3-sonli maktabda bo‘lib, mavjud vaziyatni har tomonlama tahlil qildik. Ta’lim sifatini oshirish, o‘quvchilarning xavfsiz va munosib sharoitlarda bilim olishlarini ta’minlash bo‘yicha mas’ullar bilan birgalikda aniq vazifalarni belgilab oldik”, — deya ta’kidladi shahar Kengashi raisi D.Normuradova.

O‘rganish yakunlari bo‘yicha aniqlangan kamchiliklarni bartaraf etish, ta’lim jarayonini yanada takomillashtirish hamda maktab infratuzilmasini yaxshilash yuzasidan mas’ullarga tegishli tavsiya va topshiriqlar berildi.