Xalq deputatlari Taxiatosh tumani Kengashiga O‘zbekiston Xalq demokratik partiyasidan saylangan deputat Taganberdiyev Galpak Arazdurdiyevich

O‘zbekiston Respublikasi mustaqilligining 35 yilligi arafasida mamlakatimizda mustaqillik yillarida amalga oshirilgan keng ko‘lamli islohotlar, erishilgan yutuqlar va xalqimiz hayotidagi ijobiy o‘zgarishlar haqida so‘z yuritish alohida ahamiyat kasb etadi.

Ayniqsa, sog‘liqni saqlash tizimida amalga oshirilgan islohotlar bevosita inson manfaatlari va aholi farovonligiga xizmat qilmoqda. Birlamchi tibbiy yordamni aholiga yanada yaqinlashtirish, kasalliklarning oldini olish va ularni erta aniqlash maqsadida “Oila poliklinikalari” tizimining joriy etilishi muhim qadam bo‘ldi.

Taxiatosh tumani misolida ham ushbu tizim aholiga tibbiy xizmat ko‘rsatish sifatini oshirish, fuqarolarning salomatligini muntazam nazorat qilish va profilaktik tadbirlarni kuchaytirishda muhim ahamiyat kasb etmoqda. Oila shifokorlari orqali fuqarolarning murojaatlarini o‘z vaqtida ko‘rib chiqish, kasalliklarni barvaqt aniqlash hamda zarur tibbiy tavsiyalar berish imkoniyatlari kengaymoqda.

Mustaqillik yillarida tuman tibbiyot muassasalarining moddiy-texnik bazasini yaxshilash, tibbiy xizmatlarning sifati va qulayligini oshirish borasida ham muayyan ishlar amalga oshirildi. Bugungi kunda aholining, ayniqsa, ehtiyojmand qatlamlarning tibbiy xizmatlardan foydalanish imkoniyatlarini kengaytirish davlat siyosatining ustuvor yo‘nalishlaridan biri bo‘lib qolmoqda.

Deputat sifatida aholi bilan muloqotlarda ularning sog‘liqni saqlash sohasidagi murojaat va takliflarini o‘rganish, mavjud muammolarni tegishli tashkilotlar bilan hamkorlikda hal etishga ko‘maklashish muhim vazifa, deb hisoblayman.

Zero, inson salomatligini asrash — xalq farovonligini ta’minlashning eng muhim shartlaridan biridir. “Oila poliklinikalari” tizimini yanada takomillashtirish va tibbiy xizmatlar sifatini oshirish esa sog‘lom va farovon jamiyat barpo etish yo‘lidagi muhim qadamlardan biridir.