MAHALLA YETTILIGI VA DEPUTAT HAMKORLIGI — AHOLI MUAMMOLARIGA AMALIY YECHIM

Xalq deputatlari Termiz tuman Kengashi 8-“Tajribakor” saylov okrugi deputati A. Avliyakulov saylangan hududdagi M. Eshtemirov mahalla fuqarolar yig‘inida mahalla yettiligi faoliyati o‘rganildi.

O‘rganish davomida “Mahalliy Kengash deputati faoliyatining eng muhim yo‘nalishlari bo‘yicha tavsiyalar” asosida mahalla yettiligining vazifalari, aholi bilan ishlash, fuqarolarning muammo va takliflarini o‘rganish hamda ularni hal etish bo‘yicha amalga oshirilishi lozim bo‘lgan ishlar yuzasidan fikr almashildi.

Shuningdek, mahalla yettiligi bilan mahalliy Kengash deputatining hamkorligini yanada kuchaytirish masalasiga alohida e’tibor qaratildi. Fuqarolarning deputatga murojaatlarini tizimli ravishda qayd etib borish maqsadida “Murojaatlar daftari” doimiy ravishda mahallada yuritilishi belgilab qo‘yilishi lozimligi ta’kidlandi.

Mazkur daftar orqali deputat mahallada bo‘lmagan vaqtda ham fuqarolar o‘zlarini qiynayotgan muammo, taklif va murojaatlarini yozma ravishda qoldirishlari mumkin. Deputat mahallaga tashrif buyurganida ushbu daftar bilan muntazam tanishib, unda qayd etilgan murojaatlarni o‘rganadi hamda muammolarni bartaraf etish yuzasidan tegishli tashkilotlar bilan hamkorlikda amaliy ishlarni olib boradi.

Uchrashuv davomida deputat va mahalla yettiligi o‘rtasida fuqarolar murojaatlarini o‘z vaqtida o‘rganish, muammolarni manzilli hal etish va ularning ijrosini nazorat qilib borish bo‘yicha hamkorlikni kuchaytirish yuzasidan kelishib olindi.

Tadbirda Kengash mutaxassisi K. Abdullayeva deputatning mahalla yettiligi bilan samarali hamkorligini yo‘lga qo‘yish, murojaatlarni qayd etish va ularning ijrosini nazorat qilish bo‘yicha tavsiyalar berdi.

Aholi murojaati — e’tiborda. Muammo — nazoratda. Yechim — amaliy harakatda!