Xalq deputatlari Zomin tuman Kengashi deputatlari tomonidan O‘zbekiston Respublikasining "Korrupsiyaga qarshi kurashish to‘g‘risida"gi O‘RQ–419-son Qonuni ijrosi yuzasidan tumanda amalga oshirilayotgan ishlar o‘rganilmoqda.

Deputatlik nazorati tadbirlari davomida davlat organlari va tashkilotlarida korrupsiyaning oldini olishga qaratilgan tizimli chora-tadbirlarning amalga oshirilishi, korrupsiyaga qarshi ichki nazorat mexanizmlarining joriy etilishi, manfaatlar to‘qnashuvining oldini olish, davlat xizmatlari ko‘rsatishda ochiqlik va shaffoflikni ta’minlash hamda fuqarolarning murojaatlari bilan ishlash holati tahlil qilinmoqda.

Shuningdek, Qonunning asosiy talablaridan kelib chiqib:
korrupsiyaga qarshi kurashish bo‘yicha davlat dasturlari va hududiy chora-tadbirlar ijrosi;

davlat organlari faoliyatining ochiqligi va hisobdorligi;
budjet mablag‘larining maqsadli sarflanishi ustidan nazorat;
davlat xaridlari jarayonlarining qonuniyligi;

aholining huquqiy ongi va korrupsiyaga nisbatan murosasiz munosabatini shakllantirish bo‘yicha targ‘ibot ishlari;
jismoniy va yuridik shaxslarning murojaatlarini o‘z vaqtida va qonuniy ko‘rib chiqish holatlari o‘rganilmoqda.

O‘rganishlar davomida aniqlangan muammo va kamchiliklar yuzasidan tegishli taklif hamda tavsiyalar ishlab chiqilib, mas’ul tashkilotlarga kiritiladi. Zaruratga ko‘ra, masalalar Xalq deputatlari tuman Kengashining doimiy komissiyalari va sessiyalarida muhokama qilinadi.

S.Bekmurodova
Korrupsiyaga qarshi kurashish va xavfsizlik masalalari boʻyicha doimiy komissiyasi raisi