MÁHÁLLEDEGI MASHALALAR ÚYRENILMEKTE 

Xalıq deputatları Shımbay rayonlıq Keńesi 7-sanlı “Tazajol” saylaw okrugi
Ózbekstan “Ekologiyalıq” partiyası deputatı A,Sultanbaev “Tazajol” APJ
aymaǵındaǵı xalıqtı qıynap kiyatırǵan sociallıq-ekonomikalıq hám kommunallıq
tarawdaǵı mashqalalardı úyreniw maqsetinde puqaralar menen ashıqtan-ashıq
sóylesiwler ótkerdi.  

Úyreniw dawamında úyme-úy júrip, máhálle belsendileri, nuranıylar, jaslar
hám hayal-qızlar menen sáwbetlesti, olardıń pikir-usınısları tıńlandı. 

Úyreniwler procesinde ishimlik suwı támiynatın jaqsılaw, ishki jollardı
ońlaw, elektr energiyası hám tábiyǵıy gaz támiynatındaǵı úzilisler, kóshe
jaqtılandırıw sistemasın jaqsılaw, salma hám kollektorlardı tazalaw,
shıǵındılardı óz waqtında alıp shıǵıw, sociallıq qorǵawǵa mútáj shańaraqlardı
qollap-quwatlaw, jaslardıń bántligin támiyinlew hám máhálle infrastrukturasın
rawajlandırıwǵa baylanıslı bir qatar máseleler kóterildi. 

Deputat hár bir múrájattı hár tárepleme úyrenip, olardı nızamshılıq
sheńberinde sheshiw ilajların belgiledi. Wákilligi sheńberinde sheshiliwi
múmkin bolǵan máseleler boyınsha tiyisli shólkemler menen birge islesiw,
juwapker uyımlarǵa deputatlıq sorawlar kirgiziw hám orınlanıwın turaqlı
qadaǵalawǵa alıw atap ótildi. 

Sonday-aq, máhállede ámelge asırılıp atırǵan abadanlastırıw jumısları,
qurılıs hám ońlaw processleri, xalıqqa kórsetilip atırǵan mámleketlik
xızmetlerdiń sapası da úyrenildi. Puqaralar tárepinen bildirilgen usınıslar
máhálleni bunnan bılay da abat etiw, infrastrukturanı rawajlandırıw hám
xalıqtıń turmıs abadanlıǵın arttırıwǵa qaratılǵan ilajlar rejesin
qáliplestiriwde úlken áhmietke ie ekeni atap ótildi. 

Deputat bunday úyreniwler turaqlı túrde dawam ettiriletuǵının, hár bir
múrájat itibardan shette qalmaytuǵının hám xalıqtıń máplerin támiyinlew jolında
barlıq imkaniyatlardan nátiyjeli paydalanılatuǵının atap ótti. 

Xalıq deputatları Shımbay rayonlıq Keńesi