#deputatlar_nazorati #poytaxtdeputatlari #deputatlik_faoliyati #Sessiya_oldi_organish #Namunaviy_komissiya_qarorlari

🦠 O‘rganishlarning navbatdagi manzili – Sanitariya-epidemiologik osoyishtalik va jamoat salomatligi qo‘mitasining Toshkent shahar boshqarmasi

🏛 Xalq deputatlari Toshkent shahar Kengashining Fan, ta’lim va sog‘liqni saqlash masalalari bo‘yicha doimiy komissiyasi a’zolari, shahar va tuman Kengashi deputatlari hamda Kengash kotibiyati xodimlari tomonidan sog‘liqni saqlash tizimida amalga oshirilayotgan islohotlar ijrosi yuzasidan olib borilayotgan o‘rganishlar kun davomida O‘zbekiston Respublikasi Sog‘liqni saqlash vazirligi huzuridagi Sanitariya-epidemiologik osoyishtalik va jamoat salomatligi qo‘mitasining Toshkent shahar boshqarmasida davom ettirildi.

📝 O‘rganishlar O‘zbekiston Respublikasining "Fuqarolar sog‘lig‘ini saqlash to‘g‘risida"gi Qonuni, "Aholining sanitariya-epidemiologik osoyishtaligi to‘g‘risida"gi Qonuni, Vazirlar Mahkamasining 2024-yil 29-martdagi 169-son hamda 2025-yil 13-noyabrdagi 720-son qarorlari va sohaga oid boshqa me’yoriy-huquqiy hujjatlar ijrosi doirasida amalga oshirildi.

🏢 Dastlab boshqarma boshlig‘i Kudratxodjayeva Malika Baxramovna deputatlarni yaqinda mukammal ta’mirdan chiqarilgan boshqarma binosi bilan tanishtirdi. Tashrif davomida zamonaviy laboratoriyalar, yuqori aniqlikdagi tahlil uskunalari, epidemiologik nazoratda qo‘llanilayotgan ilg‘or texnologiyalar, raqamli monitoring tizimlari, xodimlar uchun yaratilgan mehnat sharoitlari hamda fuqarolar murojaatlarini qabul qilish va ko‘rib chiqish mexanizmlari haqida batafsil ma’lumot berildi. Shuningdek, laboratoriyalarda oziq-ovqat mahsulotlari, ichimlik suvi, atmosfera havosi va tashqi muhit omillarini zamonaviy usullar asosida tekshirish jarayonlari deputatlarga amaliy tarzda namoyish etildi.

🔍 Shundan so‘ng deputatlar tomonidan tavsiyaviy savolnomada nazarda tutilgan masalalar yuzasidan boshqarma mutasaddilariga qator savollar berildi. Xususan, aholining sanitariya-epidemiologik osoyishtaligini ta’minlash bo‘yicha amalga oshirilayotgan profilaktik tadbirlar, joriy yilning birinchi yarim yilligida berilgan sanitariya-gigiyena xulosalari, ishlab chiqarish va umumiy ovqatlanish obyektlarida o‘tkazilgan ekspertizalar, sanitariya qoidalariga rioya etilishi ustidan olib borilgan nazorat ishlari, yuqumli va parazitar kasalliklarning oldini olish bo‘yicha ko‘rilayotgan choralar, hududiy dasturlar, xodimlarning ilmiy salohiyati hamda raqamli texnologiyalarni joriy etish holati yuzasidan batafsil ma’lumotlar olindi.

💬 Boshqarma rahbariyati deputatlarning barcha savollariga atroflicha javob berib, mavjud tizim, amalga oshirilayotgan ishlar hamda istiqboldagi rejalar yuzasidan batafsil axborot taqdim etdi. Deputatlar tomonidan esa laboratoriya salohiyatini yanada mustahkamlash, zamonaviy uskunalar sonini oshirish, kadrlar malakasini yuksaltirish, raqamlashtirishni kengaytirish hamda sanitariya nazoratining samaradorligini oshirish bo‘yicha qator taklif va tavsiyalar bildirildi.

⚖️ O‘rganish yakunida aniqlangan ayrim masalalarni bartaraf etish bo‘yicha deputatlar o‘z vakolatlari doirasida amaliy ko‘mak ko‘rsatish, zarur masalalarni Xalq deputatlari Toshkent shahar Kengashi doimiy komissiyasi va sessiyasi muhokamasiga kiritish hamda ularni qonunchilik asosida hal etish yuzasidan hamkorlikni davom ettirishga kelishib oldilar.

🔺 Xalq deputatlari Toshkent shahar Kengashi deputatlari tomonidan sog‘liqni saqlash va jamoat salomatligi tizimi muassasalarida olib borilayotgan o‘rganishlar izchil davom etmoqda. O‘rganishlar yakunida aniqlangan muammo va takliflar umumlashtirilib, ularning amaliy yechimini ta’minlash hamda tizim samaradorligini yanada oshirish yuzasidan tegishli choralar ko‘riladi.

📱 Telegram 📱 Instagram 📱 Facebook 📱 YouTube 🔎 E-kengash