"Deputat bilan bir kun" loyihasi doirasida Xalq deputatlari Boyovut tumani Kengashi kotibiyati mudiri, deputat Xusnara Berdiyarova tuman hokimining o‘rinbosarlari B. Usmanov, K. Abdaliyev hamda B. Abdumalikov bilan uchrashib, tumanda amalga oshirilayotgan ijtimoiy-iqtisodiy islohotlar, hududlarni rivojlantirish hamda joriy yildagi ustuvor vazifalar yuzasidan suhbatlashdi.

Shundan so‘ng kotibiyat mudiri tuman hokimining investitsiyalar, sanoat va savdo masalalari bo‘yicha o‘rinbosari B. Abdumalikov bilan alohida uchrashuv o‘tkazib, investitsiyalarni jalb etish, eksport salohiyatini oshirish hamda hududiy investitsiya loyihalarining amalga oshirilish holati yuzasidan amalga oshirilayotgan ishlar bilan tanishdi.

Ma'lum qilinishicha, 2026-yilda 120 mln AQSH dollari miqdoridagi xorijiy investitsiya va kreditlarni o‘zlashtirish rejalashtirilgan. Yanvar–iyun oylari uchun belgilangan 42,5 mln dollarlik prognozga nisbatan 59,5 mln dollar xorijiy investitsiya o‘zlashtirilib, reja 140 foizga bajarilgan.

Eksport yo‘nalishida ham ijobiy natijalar qayd etildi. Joriy yil uchun 68,3 mln dollarlik eksport amalga oshirish rejalashtirilgan bo‘lib, yanvar–iyun oylarida belgilangan prognozning to‘liq bajarilishini ta'minlash bo‘yicha amaliy ishlar olib borilayotgani ta'kidlandi. Xususan, oy yakuniga qadar ip-kalava, kiyim-kechak, un mahsulotlari hamda meva-sabzavot eksporti hisobiga reja to‘liq bajarilishi kutilmoqda.

Uchrashuv davomida Xitoy Xalq Respublikasiga amalga oshirilgan xizmat safari natijalari ham muhokama qilindi. Qayd etilishicha, Xitoylik investorlar bilan 130 mln dollarlik 7 ta istiqbolli loyiha bo‘yicha kelishuvlarga erishilgan. Shuningdek, may–iyun oylarida 5 ta xorijiy korxona davlat ro‘yxatidan o‘tkazilgan bo‘lib, yil yakuniga qadar 80 mln dollarlik yangi investitsiya loyihalarini amalga oshirish rejalashtirilgan.

Hududiy investitsiya loyihalari bo‘yicha esa joriy yilda 678,3 mlrd so‘mlik 39 ta loyihani amalga oshirish hamda 2 233 ta yangi ish o‘rni yaratish belgilangan. Bugungi kunga qadar qiymati 14,8 mlrd so‘mlik 14 ta investitsiya loyihasi ishga tushirilib, 62 ta yangi ish o‘rni yaratilgan.

Uchrashuv yakunida investitsiya loyihalarini o‘z vaqtida amalga oshirish, eksport ko‘rsatkichlarini yanada oshirish hamda yangi ish o‘rinlarini yaratish borasidagi ishlarni izchil davom ettirish yuzasidan fikr almashildi.