Xalq deputatlari Bo‘stonliq tumani Kengashining 2026-yilga mo‘ljallangan Ish rejasiga muvofiq Kengashning tegishli qaroriga asosan tumanning “S.Raximov” mahallasi “Tashabbus” mahallasida ichki yo‘llarni asfaltlashtirish bo‘yicha amalga oshirilayotgan ishlar O‘zbekiston “Adolat” sotsial-demokratik partiyasidan saylangan deputat A.Mannobov tomonidan o‘rganildi.

🔺O‘rganish davomida mahallada ta’mirlanayotgan ichki ko‘chalarda olib borilayotgan ishlar, yo‘l qoplamasining sifati, qurilish materiallarining me’yorlarga muvofiqligi, texnika va ishchi kuchining jalb etilganlik darajasi ko‘zdan kechirildi. Shuningdek, ta’mirlash ishlarining belgilangan muddatlarda va sifatli bajarilishi yuzasidan mas’ul tashkilotlar va pudratchilar bilan muloqot o‘tkazildi.

🔺Deputat aholi bilan ham suhbatlashib, ularning yo‘llar holati, transport harakati uchun yaratilayotgan sharoitlar hamda kelgusida amalga oshirilishi lozim bo‘lgan ishlar yuzasidan fikr va takliflarini tingladi. Fuqarolar tomonidan ko‘p yillardan buyon ta’mirtalab bo‘lib kelgan ichki yo‘llarning bosqichma-bosqich yangilanayotgani ijobiy baholandi.

🔺O‘rganish yakunida aniqlangan ayrim kamchiliklarni bartaraf etish, qurilish ishlarini belgilangan standartlar asosida va yuqori sifatda yakunlash bo‘yicha mutasaddi tashkilotlarga tegishli tavsiya va takliflar berildi.