Mahalliy Kengashlar faoliyatini yanada takomillashtirish, deputatlik nazoratini samarali tashkil etish hamda mahallalarda aniqlanayotgan muammolarni tizimli ravishda hal etish masalalariga bag‘ishlangan seminar o‘tkazildi.

Unda Xalq deputatlari Marg‘ilon shahar Kengashi raisi O.Axmatshayev boshchiligida shahar Kengashi deputatlari Zoom platformasi orqali ishtirok etdilar.

Seminar davomida Senat tomonidan Xorazm va Navoiy viloyatlarida yo‘lga qo‘yilgan amaliy tizim, uning samaradorligi hamda mazkur tajribani boshqa hududlarda ham joriy etish masalalari yuzasidan taqdimot o‘tkazildi. Shuningdek, mahalliy Kengash deputatlari va kotibiyatlari faoliyatini samarali tashkil etish, ish jarayonlarini aniq mexanizmlar asosida yo‘lga qo‘yish bo‘yicha tavsiyalar berildi.

Seminarda deputatlik nazoratini amalga oshirishning amaliy tartibiga ham alohida e’tibor qaratildi. Jumladan, mahallalarda aniqlangan muammolarni tuman va shahar Kengashlari muhokamasiga olib chiqish, mas’ul tashkilotlardan aniq choralar ko‘rilishi va natijalar bo‘yicha axborot talab etish, mahalliy darajada hal etish imkoniyati mavjud bo‘lmagan masalalarni esa viloyat va respublika darajasiga olib chiqish mexanizmlari tushuntirildi.

Shuningdek, deputatlarga o‘z saylov okruglariga biriktirilgan mahallalarda aholi, “mahalla yettiligi”, faollar va mas’ul tashkilotlar bilan muntazam muloqot olib borish, joylarda ishsizlik, daromad manbaining yo‘qligi, tadbirkorlikni boshlashdagi to‘siqlar, ijtimoiy masalalar hamda infratuzilmaga oid muammolarni o‘rganish yuzasidan tegishli tavsiyalar berildi.

Seminarda ilgari surilgan amaliy yondashuvlar mahallalarda aniqlanayotgan muammolarni manzilli o‘rganish, ularni tegishli Kengash muhokamasiga olib chiqish va deputatlik nazorati orqali ijrosini ta’minlashda muhim ahamiyat kasb etadi.