O‘zbekiston Respublikasi Prezidentining PQ–406-son qarori, Oliy Majlis Senati Kengashining KQ–35-V-son qarori hamda mahalliy Kengash deputati faoliyatining eng muhim yo‘nalishlari bo‘yicha belgilangan 24 ta tavsiya asosida Xalq deputatlari Marg‘ilon shahar Kengashi kotibiyat mudiri A.Ermatov va kotibiyat bosh mutaxassisi N.Akbarova tomonidan 25-Orolbo‘yi saylov okrugi hududidagi Mashad qabristonida o‘rganish ishlari olib borildi.

O‘rganish davomida, avvalo, O‘zbekiston Respublikasining 2010-yil 27-dekabrdagi O‘RQ–276-son “Dafn etish va dafn ishi to‘g‘risida”gi Qonuni talablari ijrosi ko‘zdan kechirildi. Mazkur Qonunning 1-moddasida dafn etish joylarini tanlash va saqlashda ekologik, sanitariya, shaharsozlik normalari va qoidalariga rioya etilishini ta’minlash dafn etish sohasidagi asosiy vazifalardan biri sifatida belgilangan. Qonunning 4-moddasiga ko‘ra esa dafn etish joylari tegishli ekologik, sanitariya, shaharsozlik normalari va boshqa talablar asosida saqlanishi lozim.

Shuningdek, O‘zbekiston Respublikasining 2002-yil 5-apreldagi 362-II-son “Chiqindilar to‘g‘risida”gi Qonuni talablari ijrosi ham o‘rganildi. Mazkur Qonunning asosiy maqsadlaridan biri chiqindilarning fuqarolar hayoti va sog‘lig‘iga, shuningdek, atrof-muhitga zararli ta’sirining oldini olishdan iborat. Qonunda chiqindilarni to‘plash, joylashtirish, tashish, saqlash va zararsizlantirish bilan bog‘liq jarayonlarga alohida talablar belgilangan.

Joyiga chiqib o‘rganish davomida Mashad qabristonidagi mavjud holat tahlil qilinib, ayrim infratuzilmalarni yaxshilash zarurati aniqlandi. Xususan, chiqindilarni yig‘ish joyi ta’mirga muhtoj ekani, shuningdek, qabriston hududida fuqarolar uchun qulay va xavfsiz harakatlanishni ta’minlash maqsadida qo‘shimcha yo‘laklar barpo etish zarurligi qayd etildi.

Aniqlangan kamchilik va takliflar deputatlik nazoratiga olinib, qabriston hududining sanitariya-obodonlashtirish holatini yaxshilash, chiqindilarni yig‘ish joyini tartibga keltirish hamda piyodalar harakati uchun zarur sharoitlarni yaratish bo‘yicha tegishli tashkilotlarga taklif va tavsiyalar kiritilishi belgilandi.