📚 ILK QADAM, ULKAN ORZULAR: BANDIXONDA YANGI O‘QUV YILI BOSHLANDI!

Bugun Bandixon tumanidagi 45 ta umumta’lim maktabida “Birinchi qo‘ng‘iroq” jarangi yangrab, yangi o‘quv yiliga tantanali start berildi.

Ayniqsa, tumandagi 2 115 nafar bolajonning ilk bor maktab ostonasiga qadam qo‘ygani ushbu kunni yanada unutilmas va hayajonli bayramga aylantirdi. Ularning qo‘llarida gul, qalblarida esa katta orzular bilan maktab sari yo‘l olgani — yurtimiz kelajagining yorqin ifodasidir.

Bandixon tumanidagi 1-sonli umumta'lim maktabida “Yagona Vatan, yagona xalq bo‘lib, yangi hayot va kelajak yaratamiz!” shiori ostida o‘tkazilgan Bilimlar kuni tadbirlarida o‘quvchilar, ustozlar va ota-onalar ishtirok etdi.

Tadbirda Xalq deputatlari Bandixon tumani Kengashi deputati,tumani hokimi Abdumalik Allamuradov ham ishtirok etib, o‘quvchilar, ustozlar va ota-onalarni Mustaqilligimizning 35 yilligi hamda yangi o‘quv yilining boshlanishi bilan samimiy muborakbod etib, Prezidentimizning o'quvchi yoshlar hamda ustoz murabbiylarga tabrigini o'qib eshittirdi.

“Bugun yurtimizda yosh avlodning sifatli ta’lim olishi, zamonaviy bilim va kasb-hunar egallashi uchun keng imkoniyatlar yaratilmoqda. Siz, aziz o‘quvchilar, ana shu imkoniyatlardan unumli foydalanib, puxta bilim olishingiz, ustozlaringizning ishonchini oqlashingiz va kelajakda Yangi O‘zbekiston taraqqiyotiga munosib hissa qo‘shishingiz kerak. Ishonamizki, sizlarning har bir yutug‘ingiz Vatanimizning ertangi kuni uchun mustahkam poydevor bo‘ladi”, — dedi tuman hokimi Abdumalik Allamuradov o‘z tabrigida.

1-sinfga ilk qadam qo‘ygan barcha bolajonlarga Prezident sovg‘asi — zarur o‘quv qurollari to'plamlari hamda barcha umumta'lim maktablariga kitoblar jamlanmalari tantanali ravishda topshirildi.

🔔 Bugun jaranglagan “Birinchi qo‘ng‘iroq” nafaqat yangi o‘quv yilining, balki minglab bolajonlarning katta orzular sari ilk qadamining ramziga aylandi.

Aziz o‘quvchilar! Yangi o‘quv yilingiz muborak bo‘lsin! Ilmingiz ziyoda, orzularingiz ulkan, kelajagingiz porloq bo‘lsin!