#_deputat_faoliyati
#_24_ta_masala
Ayol fuqarolar bilan ochiq muloqot: dolzarb masalalar muhokama qilindi

Xalq deputatlari viloyat Kengashi deputati L.Mardonova, Sariosiyo tumani Kengashining “23-Aeroport” saylov okrugidan saylangan deputati N.Chorshanbiyeva hamda tuman Kengashi kotibiyati bosh mutaxassisi N. Xamdamova 2-sonli umumiy o‘rta ta’lim maktabida “Aeroport” va “Alisher Navoiy” mahallalari fuqarolari bilan ochiq muloqot o‘tkazdilar.
Uchrashuv davomida hududda amalga oshirilayotgan ijtimoiy-iqtisodiy islohotlar, mahallalar infratuzilmasini yanada yaxshilash, aholi uchun munosib turmush sharoitlarini yaratish, obodonlashtirish va ko‘kalamzorlashtirish ishlarining borishi haqida batafsil ma’lumot berildi. Shuningdek, davlat dasturlari doirasida amalga oshirilayotgan loyihalar, aholini qo‘llab-quvvatlashga qaratilgan chora-tadbirlar hamda mahallalarni har tomonlama rivojlantirish yuzasidan olib borilayotgan ishlar xususida fikr almashildi.
Muloqot davomida fuqarolar tomonidan yo‘llar ta’miri, ichimlik suvi ta’minoti, elektr energiyasi, bandlik, kommunal xizmatlar sifati hamda mahallalar infratuzilmasini yanada yaxshilashga oid bir qator taklif va murojaatlar bildirildi. Ko‘tarilgan har bir masala atroflicha muhokama qilinib, ularning yechimi yuzasidan tegishli mutasaddilarga aniq vazifalar belgilab berildi. Ayrim murojaatlar joyida hal etilgan bo‘lsa, qo‘shimcha o‘rganish talab etadigan masalalar nazoratga olindi.
Uchrashuv yakunida aholi bilan bunday ochiq muloqotlarni muntazam o‘tkazish, fuqarolarning murojaatlarini o‘z vaqtida ko‘rib chiqish va ularning qonuniy manfaatlarini ta’minlash ustuvor vazifalardan biri ekani ta’kidlandi.