Xalq deputatlari Andijon shahar Kengashi raisi R.Ziyayev, viloyat Kengashi kotibiyati mudiri N.Toychiyeva, Andijon shahar Kengashi kotibiyati mudiri B.Mo‘ydinov hamda shahar Kengashi deputati A.Appaqov ishtirokida Andijon shahridagi “Z.M. Bobur” MFY hududiga aholi va mahalla raisi tomonidan kelib tushgan murojaat asosida tashrif buyurildi.

O‘rganishlar davomida fuqarolar tomonidan ko‘tarilgan asosiy muammo — Tor Baytoq ko‘chasida oqava suv (kanalizatsiya) tarmog‘ining mavjud emasligi ekani aniqlandi. Mazkur holat hudud aholisi uchun jiddiy noqulayliklar tug‘dirib, sanitariya-gigiyena sharoitlariga salbiy ta’sir ko‘rsatib kelayotgani ta’kidlandi.

Masala joyida mutasaddi tashkilotlar vakillari ishtirokida batafsil o‘rganilib, muammoni hal etish bo‘yicha aniq choralar belgilandi. Xususan, ushbu hududga oqava suv tarmog‘ini tortish loyihasini amalga oshirish uchun zarur texnik-iqtisodiy hujjatlarni shakllantirish hamda moliyalashtirish manbalarini aniqlash yuzasidan tegishli tashkilotlarga aloqa xatlari va deputatlik so‘rovlari yuborilmoqda.

Shuningdek, masalaning ijobiy yechim topishi ustidan qat’iy nazorat o‘rnatilib, qisqa muddatlarda amaliy natijaga erishish bo‘yicha ishlar izchil davom ettiriladi. Aholining yashash sharoitini yaxshilash, ularning dolzarb muammolarini o‘z vaqtida hal etish — doimiy e’tibor markazida bo‘lib qoladi.