Xalq deputatlari Andijon shahar Kengashi deputati tomonidan aholi murojaatlari hamda joylarda olib borilgan o‘rganishlar natijasida “O‘zbekiston 20 yilligi” va “Nodirabegim” mahalla fuqarolar yig‘inlari hududlarida qator dolzarb muammolar aniqlandi.

Xususan, “O‘zbekiston 20 yilligi” MFY hududidagi Furgat hamda Avg‘obog‘ ko‘chalarida yo‘l infratuzilmasining talab darajasida emasligi, asfalt qoplamasining mavjud emasligi aholiga noqulaylik tug‘dirayotgani ma’lum bo‘ldi.

Shuningdek, “Nodirabegim” MFY 2-kichik dahasida joylashgan 4a-sonli ko‘p qavatli uy oldida piyodalar harakati uchun yetarli sharoitlar yaratilmagani, zamonaviy piyodalar yo‘lakchasini barpo etish zarurati mavjudligi aniqlangan.

Mazkur muammolarni tizimli hal etish maqsadida Andijon shahar hokimligi Obodonlashtirish boshqarmasiga deputat so‘rovi yuborildi.

Aholi uchun qulay va xavfsiz infratuzilma yaratish — ustuvor vazifalardan biridir.

Holat deputat nazoratiga olingan bo‘lib, ko‘tarilgan masalalar yuzasidan amaliy choralar ko‘rilishi ta’minlanadi.