Mazkur aksiya aholining, ayniqsa yoshlarning kitobxonlik madaniyatini yuksaltirish, mahalla kutubxonalarini zamonaviy va mazmunli adabiyotlar bilan boyitish hamda kitobga bo‘lgan mehrni kuchaytirishga qaratilgan. Bugungi kunda jamiyat taraqqiyotida kitobning o‘rni beqiyos ekanini inobatga olgan holda, ushbu tashabbus katta ahamiyat kasb etmoqda.

Aksiya doirasida axborot-kutubxona markaziga kutubxonachilar, faol kitobxonlar hamda keng jamoatchilik tomonidan mingdan ortiq turli yo‘nalishdagi kitoblar keltirildi. Ular orasida badiiy adabiyotlar, ilmiy-ommabop kitoblar, bolalar adabiyoti va o‘quv qo‘llanmalar alohida o‘rin egallaydi.

To‘plangan kitoblar viloyat bo‘ylab o‘z hududida kutubxona yoki kitob burchagi tashkil etgan mahallalarga beg‘araz sovg‘a sifatida topshirilmoqda. Bu esa mahallalarda ma’naviy muhitni yanada boyitish, yoshlarni bo‘sh vaqtini mazmunli o‘tkazishga xizmat qiladi.

Marafonning dastlabki bosqichida Andijon shahridagi “Barkamol” MFY, Baliqchi tumani Chinobod shaharchasi “Omonariq” MFY hamda Andijon tumanidagi “Teraktagi” MFY kutubxonalariga kitoblar tantanali ravishda topshirildi. Ushbu maskanlarda yangi kitoblar fondi shakllanib, kitobxonlar uchun keng imkoniyatlar yaratilmoqda.

Aksiya va kitoblar marafoni izchil davom etadi. Barcha fuqarolarni ushbu xayrli ishga befarq bo‘lmasdan, o‘z hissasini qo‘shishga chorlaymiz. Agar siz ham kitob hadya qilish orqali mahallalarda kitobxonlikni rivojlantirishni istasangiz, Bobur nomidagi axborot-kutubxona markaziga tashrif buyuring — sizning hissangiz kelajak avlod uchun muhim ahamiyatga ega.