Xalq deputatlari Jondor tumani Kengashining mahalliy budjet, tadbirkorlikni rivojlantirish va iqtisodiy islohotlar masalalari bo‘yicha doimiy komissiyasi raisi Q.Safarov hamda tuman Kengashi kotibiyati bosh mutaxassislari J.Norov va R.Murodovlar tomonidan “Zarafshon” mahallasi hududida amalga oshirilayotgan investitsiya loyihalari joyiga chiqqan holda o‘rganildi.
✔️O‘rganish jarayonida loyihalar doirasida olib borilayotgan qurilish-montaj ishlarining borishi, qurilish sifati, belgilangan meyor va talablarga rioya etilishi hamda obyektlarning foydalanishga tayyorlik holati atroflicha tahlil qilindi.
✔️Monitoring natijalariga ko‘ra, ayrim obyektlarda qurilish-montaj ishlarining sifatsiz bajarilganligi, belgilangan texnik talablarga to‘liq amal qilinmaganligi bilan bog‘liq qator kamchiliklar mavjudligi aniqlandi. Mazkur holatlar investitsiya loyihalarining samarali amalga oshirilishi va aholi uchun yaratilayotgan infratuzilma obyektlarining sifatli xizmat ko‘rsatishiga salbiy ta’sir ko‘rsatishi mumkinligi ta’kidlandi.
✔️Aniqlangan kamchiliklarni o‘z vaqtida bartaraf etish, mas’ul tashkilotlar faoliyatini muvofiqlashtirish hamda qurilish ishlari sifatini ta’minlash maqsadida tuman hokimining o‘rinbosari X.Bafoyev nomiga deputat so‘rovi yuborildi. So‘rovda kamchiliklarni qisqa muddatlarda bartaraf etish, qurilish ishlari sifati ustidan nazoratni kuchaytirish hamda amalga oshirilgan ishlar yuzasidan tegishli ma’lumot taqdim etish masalalari belgilandi.
✔️Xalq deputatlari Jondor tumani Kengashi tomonidan investitsiya loyihalarining samarali va sifatli amalga oshirilishi ustidan deputatlik nazorati izchil davom ettiriladi. Bu esa davlat mablag‘laridan oqilona foydalanish, tadbirkorlikni rivojlantirish va aholi manfaatlarini ta’minlashga xizmat qiladi.