Xalq deputatlari Tuproqqal’a tuman Kengashi deputati Nafisa Qurbonova “Saidlar” mahallasidagi faol xotin-qizlar bilan uchrashuv o‘tkazdi.

Uchrashuv davomida mahallada mavjud ijtimoiy muammolar, oila mustahkamligini ta’minlash hamda xotin-qizlarning jamiyatdagi faolligini oshirish masalalari yuzasidan ochiq muloqot tashkil etildi. Suhbat jarayonida joriy yilning o‘tgan davrida mahallada ajrimlar soni 2025-yilning shu davriga nisbatan oshgani qayd etildi. Shuningdek, xotin-qizlar o‘rtasida huquqbuzarliklar, jumladan, yo‘l harakati qoidalarini buzish holatlari ko‘paygani ta’kidlandi.

Uchrashuvda erta ajrimlarning oldini olish, oilalarda sog‘lom ma’naviy muhitni shakllantirish, xotin-qizlar bandligini ta’minlash, ularni kasb-hunarga o‘qitish hamda tadbirkorlik faoliyatini qo‘llab-quvvatlash masalalariga alohida e’tibor qaratildi.

Deputat Nafisa Qurbonova tomonidan xotin-qizlar uchun yaratilayotgan imkoniyatlar, imtiyozli kreditlar va davlat dasturlari haqida batafsil ma’lumot berildi. Shuningdek, ishtirokchilar tomonidan bildirilgan taklif va mulohazalar tinglanib, mavjud muammolarni hal etish yuzasidan tegishli tavsiyalar berildi.

Mazkur uchrashuv mahallada xotin-qizlar faolligini oshirish, oilalarni mustahkamlash va ijtimoiy muammolarni bartaraf etish borasidagi ishlarni yanada samarali tashkil etishga xizmat qildi.