Har tong ishga, o‘qishga yoki kundalik yumushlarimiz sari shoshilar ekanmiz, ozoda ko‘chalar, suv sepilib fayz kirgan yo‘laklar va atrofga taralgan gul iforidan bahramand bo‘lamiz.

Ammo bu ozodalik va go‘zallik ortida shahrimizning ko‘rinmas qahramonlari — obodonlashtirish xodimlarining mashaqqatli mehnati mujassam. Ular tong yorishmasidan ish boshlaydi, issiq-sovuq, yomg‘ir-qor demay shahrimiz obodligi va ozodaligi yo‘lida sidqidildan xizmat qiladi.

Ularning sa’y-harakatlari tufayli ko‘chalarimiz ozoda, yashil hududlarimiz ko‘rkam, mahallalarimiz esa yanada fayzli va jozibador qiyofa kasb etmoqda.

Obodonlashtirish xodimlarining mehnatini qadrlash, ularga hurmat bilan munosabatda bo‘lish va shahar tozaligini saqlashga o‘z hissamizni qo‘shish barchamizning fuqarolik burchimizdir.

Toza va obod shahar — unda yashayotgan har bir insonning madaniyati, mas’uliyati va Vatanga bo‘lgan mehrining ifodasidir.