#deputat_axboroti #poytaxtdeputatlari #deputatlik_faoliyati
❗️ Xalq deputatlari Toshkent shahar Kengashi deputati Ulug‘bek Ziyodullayev 2026-yilning birinchi choragi bo‘yicha axborot berdi

🏛 Xalq deputatlari Toshkent shahar Kengashi deputati Ulug‘bek Ziyodullayev tomonidan Hayratiy mahalla fuqarolar yig‘inida 22-“Bog‘obod” saylov okrugiga qarashli mahalla vakillari, faollar hamda fuqarolar ishtirokida 2026-yilning birinchi choragi davomida amalga oshirilgan deputatlik faoliyati yuzasidan ochiq axborot uchrashuvi tashkil etildi.

📝 Uchrashuv davomida deputat tomonidan hisobot davrida olib borilgan ishlar, hududiy o‘rganishlar, aholi murojaatlari asosida amalga oshirilgan amaliy choralar hamda ilgari surilgan tashabbuslar haqida batafsil ma’lumot berildi.

🗣 Ta’kidlanganidek, deputat saylovchilar manfaatlarini himoya qilish, hududlardagi mavjud muammolarni o‘rganish va ularni bartaraf etish bo‘yicha tizimli ishlar olib bordi. Xususan, xalq deputatlari Toshkent shahar Kengashining sessiyalarida hamda mahalliy byudjet, tadbirkorlikni rivojlantirish va iqtisodiy islohotlar masalalari bo‘yicha doimiy komissiya yig‘ilishlarida faol ishtirok etib, dolzarb masalalar yuzasidan qator taklif va tashabbuslarni ilgari surdi.

📁 Hisobot davomida mahalliy Kengash deputati faoliyatining eng muhim 24 ta yo‘nalishi asosida hududlarda olib borilgan o‘rganishlar haqida ham to‘xtalib o‘tildi. Jumladan, yoshlar bandligini ta’minlash, tibbiy xizmat sifati, sport maydonchalari va ta’lim muassasalari infratuzilmasi, kambag‘allikni qisqartirish, ijtimoiy himoya tizimi, xotin-qizlar va yoshlar bilan ishlash samaradorligi masalalari doimiy nazoratga olingani qayd etildi.

📉 Shuningdek, ichki yo‘llar holati, tungi yoritish tizimi, jamoat transporti, chiqindilarni o‘z vaqtida olib chiqish, elektr energiyasi, gaz va ichimlik suvi ta’minoti bilan bog‘liq muammolar yuzasidan tegishli tashkilotlar bilan hamkorlikda o‘rganishlar olib borildi.

💡 Deputat tomonidan fuqarolar murojaatlari asosida bir qator deputatlik so‘rovlari yuborilgani alohida ta’kidlandi. Xususan, “Chamanzor” mahallasidagi bolalar maydonchasining nosoz holati, “Oqmachit” mahallasidagi mini futbol maydonchasini ta’mirlash, “Birlik” avtoshox bekatida yo‘lovchilar uchun qulay sharoit yaratish hamda Uchtepa ko‘chasining yakunlanmay qolgan qismida asfaltlash ishlarini tugallash masalalari deputatlik nazoratiga olinib, tegishli tashkilotlarga aniq vazifalar yuklatildi.

🔺 Bundan tashqari, Ko‘rkamobod mahallasida o‘tkazilgan uchrashuvlar davomida aholi tomonidan bildirilgan ijtimoiy himoya, ichki yo‘llarni ta’mirlash, hududni obodonlashtirish, ichimlik suvi va tungi yoritish bilan bog‘liq murojaatlar o‘rganilib, ularni hal etish yuzasidan amaliy choralar ko‘rildi.

📋 Hisobot davomida atrof-muhitni muhofaza qilish va hududlarni obodonlashtirish masalalariga ham alohida e’tibor qaratildi. Xususan, chiqindilarni yig‘ish va olib chiqish tizimini yaxshilash, qo‘shimcha chiqindi qutilari o‘rnatish, daraxt ekish aksiyalarini tashkil etish va yashil hududlarni kengaytirish bo‘yicha amaliy ishlar olib borilayotgani ma’lum qilindi. Shuningdek, Quyi Darxon mahalla fuqarolar yig‘ini binosini ta’mirlash yuzasidan kelib tushgan murojaat deputat tashabbusi bilan ijobiy hal etilib, mahalla binosi to‘liq ta’mirdan chiqarilgani qayd etildi.

🔎 Uchrashuv yakunida fuqarolar tomonidan bildirilgan taklif va murojaatlarni tizimli hal etish, zarur hollarda deputatlik so‘rovlari yuborish, navbatdagi sessiyalarga hududiy muammolarni kiritish hamda doimiy komissiyalar bilan hamkorlikda nazorat tadbirlarini kuchaytirish bo‘yicha kelishib olindi.

📱 Telegram 📱 Instagram 📱 Facebook 📱 YouTube 🔎 E-kengash