“BIZ GIYOHVANDLIKKA QARSHIMIZ!” — SOG‘LOM HAYOT TARZINI TARG‘IB ETUVCHI OMMAVIY TADBIR

Namangan shahrida yoshlar o‘rtasida sog‘lom turmush tarzini keng targ‘ib qilish, giyohvandlik va turli zararli illatlarning oldini olish, aholining sportga bo‘lgan qiziqishini yanada oshirish maqsadida ommaviy sport-sog‘lomlashtirish tadbiri o‘tkazildi.

O‘zbekiston Respublikasi Prezidentining PF-207-sonli Farmoni ijrosini ta’minlash maqsadida tashkil etilgan tadbir “Biz giyohvandlikka qarshimiz!” shiori ostidagi sog‘lomlashtirish yurish marafoni, shuningdek, fleshmob va badantarbiya mashg‘ulotlarini qamrab oldi.

Tadbirda 7 yoshdan 70 yoshgacha bo‘lgan aholi va yoshlar faol ishtirok etdi. Shahar hududidagi yoshlar, xotin-qizlar hamda aholining turli qatlamlaridan 2 400 nafardan ziyod ishtirokchi qatnashdi.

Tadbirda Xalq deputatlari Namangan shahar Kengashi deputatlari — Zafar Sapaev, Shoira To‘rabaeva, A. Raxmatulloev va A. Nasriddinovlar ham faol ishtirok etib, sog‘lom turmush tarzini targ‘ib qilish hamda giyohvandlikka qarshi kurashish borasidagi ezgu tashabbuslarni qo‘llab-quvvatladilar.

Ko‘tarinki kayfiyatda o‘tgan marafon davomida ishtirokchilar sog‘lom hayot tarzi, jismoniy faollik va sportning inson salomatligidagi ahamiyatini namoyon etdilar. Ayniqsa, turli yosh vakillarining bir maydonda birlashib, “Biz giyohvandlikka qarshimiz!” degan ezgu g‘oya atrofida jam bo‘lishi tadbirning asosiy maqsadini yanada yorqin ifoda etdi.

Bugun sog‘lom avlod — ertangi farovon jamiyatning mustahkam poydevoridir. Shu bois yoshlarni sportga jalb etish, ularning bo‘sh vaqtini mazmunli tashkil etish, sog‘lom va faol hayot tarzini qaror toptirish hamda giyohvandlik kabi zararli illatlarga qarshi immunitetni shakllantirish borasidagi targ‘ibot-tashviqot ishlari izchil davom ettiriladi.