ПФ–209-СОНЛИ ФАРМОН ИЖРОСИ ДОИРАСИДА “МАҲАЛЛА ЕТТИЛИГИ” ФАОЛИЯТИ ЎРГАНИЛДИ

Халқ депутатлари Янгиқўрғон тумани Кенгаши депутати Боймирзаев Улуғбек Муҳаммадович томонидан сайлов округи ҳудудида Ўзбекистон Республикаси Президентининг 2023 йил 21 декабрдаги ПФ–209-сонли Фармонида белгиланган вазифалар ижроси юзасидан ўрганиш ишлари олиб борилди.
Ўрганишда маҳалла фаоллари, нуронийлар, жамоатчилик вакиллари ҳамда “маҳалла еттилиги” аъзолари иштирок этди. Мулоқот давомида маҳаллада аҳоли муаммоларини аниқлаш, хонадонбай ва фуқаробай ишлаш, мурожаатларни ўз вақтида кўриб чиқиш ҳамда уларни тегишли ташкилотлар билан ҳамкорликда ҳал этиш борасида амалга оширилаётган ишлар муҳокама қилинди.
Хусусан, маҳалла раиси, ҳоким ёрдамчиси, ёшлар етакчиси, хотин-қизлар фаоли, профилактика инспектори, ижтимоий ходим ва солиқ инспекторининг ўзаро ҳамкорликдаги фаолияти, улар ўртасида вазифаларнинг тўғри тақсимланганлиги ҳамда аҳоли билан манзилли ишлаш тизимига алоҳида эътибор қаратилди.
Шунингдек, маҳалладаги ижтимоий ҳимояга муҳтож, кам таъминланган ва эҳтиёжманд оилаларни қўллаб-қувватлаш, ишсиз фуқаролар бандлигини таъминлаш, уларни касб-ҳунарга ўқитиш ва тадбиркорликка жалб этиш бўйича кўрилаётган чоралар таҳлил қилинди.
Ёшларнинг бўш вақтини мазмунли ташкил этиш, уларни замонавий касблар ва тадбиркорликка йўналтириш, хотин-қизларнинг муаммоларини ўрганиш, оилавий низоларнинг олдини олиш, ҳуқуқбузарликлар профилактикаси ҳамда маҳаллада соғлом ижтимоий-маънавий муҳитни таъминлаш масалалари юзасидан ҳам фикр алмашилди.
Маҳалла фаоллари ва нуронийлар томонидан ҳудуддаги мавжуд муаммолар, аҳолини қийнаб келаётган масалалар ҳамда уларни бартараф этиш бўйича таклифлар билдирилди. Фуқароларнинг мурожаатларини маҳалланинг ўзида ҳал этиш, ҳар бир хонадоннинг ҳолатини чуқур ўрганиш ва эҳтиёжманд оилаларга манзилли кўмак кўрсатиш лозимлиги таъкидланди.
Депутат Боймирзаев Улуғбек Муҳаммадович “маҳалла еттилиги” аъзолари аҳоли билан доимий мулоқотда бўлиши, ҳар бир мурожаат ортида инсон тақдири турганини чуқур ҳис этган ҳолда масъулият билан иш олиб бориши зарурлигини қайд этди.
Ўрганиш якунида “маҳалла еттилиги” фаолияти самарадорлигини янада ошириш, нуронийлар ва маҳалла фаолларининг ҳаётий тажрибасидан кенг фойдаланиш, аниқланган муаммоларни мутасадди ташкилотларга йўналтириш ва уларнинг ижросини депутатлик назоратига олиш юзасидан тегишли тавсиялар берилди.