Termiz shahrini ekologik toza, yashil va sog‘lom hududga aylantirish, tabiatga yetkazilayotgan har qanday zararlarning oldini olish hamda bu boradagi qonun hujjatlari ijrosini qat’iy nazorat qilish deputatlik faoliyatining eng dolzarb yo‘nalishlaridan biridir.

Shu munosabat bilan, Xalq deputatlari Termiz shahar Kengashi deputatlariga biriktirilgan tashkilotlar faoliyatini tizimli o‘rganish doirasida Kengash kotibiyati mudiri A.Ashurov, Kengashning Agrar, suv xo‘jaligi va ekologiya masalalari bo‘yicha doimiy komissiyasi a’zosi, ekspert guruhi a’zosi X.Jurayev hamda kotibiyat bosh mutaxassisi R.Mamashukurovlar Termiz shahar Ekopolitsiya (ekologik nazorat) bo‘limida bo‘ldilar.

Ushbu o‘rganish tadbiri shahar hududida ekologik barqarorlikni ta’minlash va tabiatga nisbatan qonunbuzarliklarga chek qo‘yishda muhim o‘rin tutuvchi quyidagi ikki fundamental qonun ijrosi kesimida olib borildi:

O‘zbekiston Respublikasining “Tabiatni muhofaza qilish to‘g‘risida” 1992-yil 9-dekabrdagi 754-XII-sonli Qonuni talablaridan kelib chiqib, quyidagilar tahlil qilindi:

• Yashil hududlarni asrash: “Yashil makon” umummilliy loyihasi doirasida ekilgan ko‘chatlarni parvarishlash hamda moratoriy talablariga zid ravishda daraxt va butalarni noqonuniy kesish holatlariga qarshi kurashish samaradorligi;

• Atmosfera havosi va suv muhofazasi: Sanoat korxonalari va maishiy ob’ektlar tomonidan atrof-muhitni, daryo va oqova suv tarmoqlarini ifloslantirish holatlarining oldini olish choralari.

O‘zbekiston Respublikasining “Ekologik nazorat to‘g‘risida” 2013-yil 27-dekabrdagi O‘RQ-363-sonli Qonuniga asosan ekopolitsiya va ekologiya inspektorlarining nazorat tadbirlari ko‘rib chiqildi:

• Ekoreydlar va profilaktika: Shahardagi mahallalar, jamoat joylari va daryo bo‘ylarida o‘tkazilayotgan tezkor reyd tadbirlarining natijadorligi;

• Noqonuniy chiqindixonalarga chek qo‘yish: Chiqindilarni belgilanmagan joylarga tashlash, ekologik madaniyatsizlikka yo‘l qo‘ygan shaxslarni aniqlash hamda ularga nisbatan ma’muriy choralar ko‘rish holati;

• Jamoatchilik bilan hamkorlik: Ekologik nazoratni amalga oshirishda "mahalla yettiligi", jamoatchilik vakillari va OAV bilan o‘zaro hamkorlik aloqalari.

"Tabiatni asrash — nafaqat qonuniy majburiyat, balki kelajak avlod oldidagi eng buyuk insoniy burchimizdir. Ekopolitsiya faoliyati har bir mahallada amalda sezilishi, daraxtlarni asrash va tozalikni saqlash borasida profilaktika ishlari kuchaytirilishi lozim. Ekologiyaga zarar yetkazgan har qanday shaxs, maqomidan qat’i nazar, qonun oldida javob berishi shart. Bu borada qat'iy nazoratni birgalikda ta'minlaymiz," — deya ta'kidladi komissiya a'zosi.

O‘rganish yakunida shahar Ekopolitsiya bo‘limining moddiy-technika bazasini yaxshilash, mahallalarda ekologik madaniyatni oshirish bo‘yicha deputatlar ishtirokida targ‘ibot tadbirlarini ko‘paytirish hamda aniqlangan kamchiliklarni bartaraf etish yuzasidan tizimli tavsiyalar berildi.