Xalq deputatlari Xorazm viloyati Kengashi deputati S. Sapoyev tomonidan Bog‘ot tumanidagi “Gulshan” mahallasida ijtimoiy soha obyektlari va tashkilotlarning kuz-qish mavsumiga tayyorgarlik holati o‘rganildi.

O‘rganish davomida mahalladagi maktab va oilaviy poliklinikada bo‘lib, isitish tizimlarining mavsumga shayligi, qozonlarning sozligi, ko‘mir zaxirasi hamda xonalarda bir xil haroratni ta’minlash imkoniyatlari ko‘zdan kechirildi. Shuningdek, isitish quvurlarining bino bo‘ylab bir tekis taqsimlangani va maktab derazalarining zamonaviylariga almashtirilgani qayd etildi.

 Oilaviy poliklinikada zamonaviy sharoitlar yaratilmoqda. Yangi qurib bitkazilgan poliklinikada yashil energetika, suv ta’minoti va isitish tizimlari zamonaviy talablarga muvofiq tashkil etilgan. Muassasa yaqin kunlarda foydalanishga topshirilishi rejalashtirilgan.

 O‘rganish davomida aniqlangan kamchiliklarni bartaraf etish yuzasidan mas’ul mutasaddilarga tegishli topshiriqlar berilib, ularni hal etish bo‘yicha chora-tadbirlar belgilab olindi.

 Ijtimoiy soha obyektlarining kuz-qish mavsumiga puxta tayyorlanishi aholiga sifatli xizmat ko‘rsatish, ta’lim muassasalarida o‘quvchilar va tibbiyot muassasalarida bemorlar uchun qulay hamda xavfsiz sharoit yaratishda muhim ahamiyatga ega.