Shu maqsadda bugun Xalq deputatlari Sardoba tumani Kengashida “Milliy tiklanish” demokratik partiyasidan saylangan deputatlarning yig‘ma jildlari o‘rganildi.
O‘rganish jarayonida Xalq deputatlari Sardoba tumani Kengashi kotibiyati mudiri Q.O‘tayev hamda bosh mutaxassis S.Nomozov tomonidan partiyadan saylangan deputatlar — G‘.Saitboev, G.Suvonqulova va B.Suyunovlarning faoliyatiga oid yig‘ma jild va hujjatlar ko‘zdan kechirildi.
O‘rganish davomida deputatlarning sessiya kun tartibiga tashabbus va takliflar kiritishi, deputatlik so‘rovi institutidan samarali va maqsadli foydalanishi, saylovchilar hamda fuqarolarning murojaatlari bilan ishlash holatiga alohida e’tibor qaratildi.
Shuningdek, deputatlik guruhi tomonidan amalga oshirilishi lozim bo‘lgan vazifalar, partiyaning dasturiy maqsad va ustuvor yo‘nalishlarini hududda izchil ilgari surish, shuningdek, mazkur maqsadlarni o‘zida mujassam etgan loyihalarni aholi o‘rtasida keng targ‘ib qilish yuzasidan tegishli tushuntirish va amaliy tavsiyalar berildi.
Tadbir davomida deputatlarning faoliyatini yanada takomillashtirish, hujjatlarni belgilangan tartibda yuritish, saylovchilar bilan muntazam muloqotni yo‘lga qo‘yish hamda hudud aholisi uchun dolzarb bo‘lgan masalalarni mahalliy Kengash sessiyalariga tashabbus sifatida olib chiqish muhimligi ta’kidlandi.
Bunday amaliy o‘rganishlar deputatlarning mas’uliyatini yanada oshirish, ularning partiya dasturiy vazifalarini hayotga tatbiq etishdagi faolligini kuchaytirish va “Milliy tiklanish” demokratik partiyasining elektorat manfaatlarini mahalliy vakillik organlarida izchil ifoda etishiga xizmat qiladi.