«ҚУТЛУҒТОЛ» МАҲАЛЛАСИДА ОБОДОНЛАШТИРИШ ИШЛАРИ ЖАДАЛ ДАВОМ ЭТМОҚДА
Бугун туман ҳокими, Халқ депутатлари Янгиқўрғон тумани Кенгаши депутати Нажмиддинов Асадулла Икромович кенг кўламли ободонлаштириш ва бунёдкорлик ишлари амалга оширилаётган «Қутлуғтол» маҳалласида бўлди.
«Оғир» тоифага киритилган мазкур маҳаллада аҳоли учун муносиб турмуш шароитларини яратиш мақсадида ички йўлларни асфальтлаш, тик қудуқ қазиш, ариқларни бетонлаш ҳамда иккита трансформатор пунктини ўрнатиш ишлари босқичма-босқич амалга оширилмоқда.
Айни пайтда асфальт ётқизилган йўлларнинг икки чеккаси аҳоли ҳашари асосида бетонланиб, ҳудуддаги эски деворлар янгиланмоқда. Мазкур ишлар маҳалланинг қиёфасини янада обод ва кўркам этиш, аҳолига қулай шароитлар яратишга хизмат қилмоқда.
Шунингдек, туман ҳокими томорқасидан самарали фойдаланаётган хонадонларда бўлиб, амалга оширилаётган ишлар билан яқиндан танишди. Аҳоли вакиллари билан мулоқот давомида уларнинг таклиф ва мурожаатлари тингланди.