Xalq deputatlari Qo‘qon shahar Kengashi deputati F.Kaxxarova tomonidan saylovchilar murojaatlari asosida yuborilgan deputatlik so‘rovi yuzasidan mas’ul tashkilot — Qo‘qon shahar elektr ta’minoti korxonasi tomonidan rasmiy javob taqdim etildi.

Deputatlik so‘rovida "Shaldiramoq" mahalla fuqarolar yig‘inining Baxmalbob ko‘chasida joylashgan eskirgan elektr uzatish simyog‘ochlarining texnik holati, aholi xavfsizligini ta’minlash hamda elektr ta’minoti sifatini yaxshilash masalalari ko‘tarilgan edi.

Mas’ul tashkilot mutaxassislari tomonidan hududda joyiga chiqib o‘rganish ishlari olib borilib, murojaatda qayd etilgan holatlar o‘z tasdig‘ini topdi. O‘rganish natijalariga ko‘ra, mavjud yog‘och tayanchlar eskirgani hamda ularni zamonaviy temir-beton tayanchlarga almashtirish zarurligi e’tirof etildi.

Taqdim etilgan rasmiy javobga ko‘ra, mazkur hududdagi elektr tarmoqlarini yangilash va eskirgan tayanchlarni almashtirish ishlari davlat dasturlari doirasidagi reja-grafikka kiritilgan bo‘lib, belgilangan muddatlarda amalga oshirilishi ma’lum qilindi.

Deputat F.Kaxxarova tomonidan mazkur masala deputatlik nazoratida saqlanib, rejalashtirilgan ishlarning o‘z vaqtida va sifatli bajarilishi yuzasidan monitoring olib borilishi hamda saylovchilarga qo‘shimcha ma’lumotlar muntazam yetkazib borilishi ta’kidlandi.

Xalq deputatlari Qo‘qon shahar Kengashi