Xalq deputatlari Chilonzor tumani Kengashining navbatdagi sessiyasida Chilonzor tumani “Yakkatut” mahalla fuqarolar yig‘ini hududida “Mening bog‘im” loyihasini amalga oshirish to‘g‘risidagi masala ko‘rib chiqilib, tegishli qaror qabul qilindi.

Qayd etilganidek, mazkur loyiha O‘zbekiston Respublikasi Prezidentining 2023-yil 23-noyabrdagi PF–199-son Farmoni hamda O‘zbekiston Respublikasi Vazirlar Mahkamasining 2024-yil 26-martdagi 156-son qarori talablariga muvofiq, “Ochiq budjet” axborot portalida jamoatchilik fikri asosida o‘tkazilgan ovoz berish yakunlariga ko‘ra g‘olib deb topilgan tashabbusni amalga oshirish maqsadida tasdiqlandi.

Qarorga muvofiq, loyiha doirasida 0,41 gektar yer maydonida “Mening bog‘im” barpo etish, uzoq yillik mevali va manzarali daraxtlar hamda butalarni ekish, piyodalar yo‘laklarini barpo etish, aholi dam olishi uchun o‘rindiqlar o‘rnatish, zamonaviy yoritish hamda sug‘orish tizimlarini tashkil etish ishlari amalga oshiriladi.

Shuningdek, mazkur loyihani amalga oshirish uchun O‘zbekiston Respublikasi Davlat budjetidan 250 million so‘m mablag‘ ajratilgani ma’lumot uchun qabul qilindi.

Sessiya davomida Chilonzor tumani hokimi S. Xolxo‘jayev tomonidan mazkur loyiha yuzasidan batafsil axborot berildi. Xususan, loyihaning amalga oshirilish manzili, belgilangan hudud, unda bajarilishi rejalashtirilayotgan obodonlashtirish va ko‘kalamzorlashtirish ishlari, shuningdek, loyiha doirasida nazarda tutilgan chora-tadbirlarning mazmun-mohiyati atroflicha tushuntirildi.

Sessiya qaroriga asosan, mas’ul tashkilotlarga loyiha ishlarini amaldagi qonunchilik hujjatlari talablariga muvofiq, sifatli va belgilangan muddatlarda amalga oshirish yuzasidan tegishli vazifalar yuklatildi hamda qaror ijrosi ustidan nazorat Xalq deputatlari Chilonzor tumani Kengashining Qurilish, kommunal xo‘jalik, suv xo‘jaligi, ekologiya, sanoat va transport masalalari bo‘yicha doimiy komissiyasi zimmasiga yuklatildi.