Kotibiyat mudiri, deputat Q.O'tayev “Do'stlik” mahallasidagi 22-sonli umumta’lim maktabida tashkil etilgan “So‘nggi qo‘ng‘iroq” tadbirida ishtirok etdi. Tadbir ko‘tarinki kayfiyat, quvonch va hayajonga boy lahzalar ostida o‘tdi.
Bayram davomida bitiruvchi yoshlarning bugungi kunga qadar erishgan yutuqlari e’tirof etilib, ularning kelgusidagi maqsad va intilishlariga omad tilandi. Tadbirda ustozlar, ota-onalar hamda jamoatchilik vakillari ishtirok etib, bitiruvchilarga o‘zlarining samimiy tilaklarini bildirdilar.
Shuningdek, deputat Prezidentimizning bitiruvchi yoshlarga yo‘llagan bayram tabrigini o‘qib eshittirib, bitiruvchilarni ushbu unutilmas kun bilan samimiy muborakbod etdi. U yoshlarga kelgusida Vatan ravnaqi uchun munosib hissa qo‘shadigan yetuk va bilimli insonlar bo‘lib kamol topishlarini tiladi.
Tadbir davomida o‘quvchilar tomonidan tayyorlangan badiiy chiqishlar, she’r va kuy-qo‘shiqlar bayramga yanada ko‘tarinki ruh bag‘ishladi.