O‘zbekiston Liberal-demokratik partiyasining “Xalq bilan birga” umum­milliy dasturi doirasida Oliy Majlis Qonunchilik palatasi deputati Gavhar Olimova Sirdaryo viloyati Sardoba tumanida saylovchilar bilan uchrashuvlar o‘tkazdi. Tadbir davomida deputat tuman hokimi Ziyodulla Karimov xamda tuman deputati Jasur Umarovlar bilan uchrashib, hududdagi infratuzilmani yaxshilash, aholining oqar suv bilan ta’minoti, sanoat zonasini tashkil etish hamda qishloq xo‘jaligi mahsulotlarini qayta ishlash, naslli jo‘jalar yetishtirish, baliqchilikni rivojlantirish va investorlar ishtirokida istirohat bog‘lari barpo etish orqali 1000 dan ortiq ish o‘rinlari yaratish masalalarini muhokama qildi.
Shuningdek, deputat “Xalqobod” mahallasidagi 1-sonli texnikumda o‘tkazilgan “Ochiq eshiklar kuni”da ishtirok etib, yoshlar bilan muloqot qildi hamda ularning muammo va takliflarini tingladi. Tadbir davomida “Yurtdosh” mahallasida qurilayotgan jamoat parki ko‘zdan kechirildi, “Yurakka yo‘l” aksiyasi doirasida esa “Quyitosh” mahallasida yashovchi nogironligi bo‘lgan Barno Djiyanovaning
uy-joyini ta’mirlash va hovlisini obodonlashtirish bo‘yicha murojaati joyida hal etilib, mas’ullarga tegishli topshiriqlar berildi.