Xalq deputatlari Bo‘stonliq tumani Kengashining 2026-yilga mo‘ljallangan Ish rejasiga muvofiq O‘zbekiston “Milliy tiklanish” demokratik partiyasidan saylangan deputatlar F.Axmedov, J.Abdixayomova tomonlaridan tuman hokimi maslahatchisi X.Akmalov ishtirokida Kambag‘allikni qisqartirish va bandlikka ko‘maklashish bo‘limida O‘zbekiston Respublikasining “Davlat tili to‘g‘risida”gi Qonuni ijrosi ishlab chiqilgan savolnomalar asosida o‘rganildi.

O‘rganish davomida bo‘limda Qonun talablariga rioya etilishi, ish yuritish hujjatlarining davlat tilida rasmiylashtirilishi, fuqarolar bilan muloqot jarayonlarida davlat tilidan foydalanish holati hamda tashqi va ichki yozuvlarning qonun talablariga muvofiqligi ko‘rib chiqildi.

Shuningdek, bo‘limda tayyorlanayotgan buyruqlar, qarorlar, ma’lumotnomalar, xizmat xatlari va boshqa rasmiy hujjatlarning davlat tilida yuritilishi, xodimlarning davlat tili me’yorlariga amal qilishi hamda davlat tilining nufuzini oshirishga qaratilgan targ‘ibot ishlari tahlil qilindi.

O‘rganish jarayonida bo‘limning mas’ul xodimlar bilan suhbat o‘tkazilib, davlat tili haqidagi qonun hujjatlari mazmun-mohiyati, uning ijrosini ta’minlashdagi mas’uliyat hamda davlat tilidan to‘g‘ri va samarali foydalanish masalalari muhokama qilindi. Qonun talablarini to‘liq ta’minlash, rasmiy hujjatlarda imloviy va uslubiy xatolarga yo‘l qo‘ymaslik, fuqarolar murojaatlariga davlat tilida sifatli javob berish yuzasidan tegishli tavsiyalar berildi.