Muzrabot tumani hokimi, xalq deputatlari tuman Kengashi deputati Abdulla Mamatqulovning navbatdagi sayyor qabuli “Buyuk ipak yo‘li” mahallasidagi 41-umumta’lim maktabi binosida o‘tkazildi. Unda tuman hokimining tegishli o‘rinbosarlari, korxona va tashkilotlar rahbarlari hamda mahalla aholisi ishtirok etdi.

Sayyor qabulda xalq deputatlari Muzrabot tumani Kengashining 16-Sho‘rob saylov okrugidan saylangan deputati Svetlana Jumayeva ham qatnashdi.

Qabul davomida fuqarolar tomonidan bildirilgan murojaatlar belgilangan tartibda ko‘rib chiqildi. Aksariyat murojaatlar joyida ijobiy hal etildi. Qo‘shimcha mablag‘ talab etadigan yoki sud-huquq sohasiga oid masalalar yuzasidan esa tegishli huquqiy tushuntirishlar berildi.

Shuningdek, deputat Svetlana Jumayeva o‘z saylov okrugiga qarashli “Buyuk ipak yo‘li” mahallasida mavjud ayrim muammolarni hal etish yuzasidan tuman hokimiga murojaat qilib, aholi uchun dolzarb bo‘lgan masalalarga e’tibor qaratdi.

Sayyor qabul davomida ichki yo‘llarni ta’mirlash, ichimlik suvi ta’minotini yaxshilash, yoshlar masalalari hamda boshqa ijtimoiy muammolar bo‘yicha kelib tushgan murojaatlar o‘rganilib, ularning yechimi bo‘yicha tegishli mas’ullarga topshiriqlar berildi hamda ijrosi nazoratga olindi.

Bunday sayyor qabullar aholi bilan ochiq muloqotni ta’minlash, hududlardagi muammolarni joyida o‘rganish va ularni bartaraf etishda muhim o‘rin egallaydi.