“Qiziloy”da maktabgacha ta’lim sifati deputatlik nazoratida 

 Xalq deputatlari Ohangaron tuman Kengashi tomonidan
maktabgacha ta’lim muassasalari faoliyati ustidan jamoatchilik va deputatlik nazoratini
kuchaytirishga qaratilgan amaliy ishlar izchil davom etmoqda. Xalq deputatlari tuman
Kengashiga “Qiziloy” okrugidan saylangan deputat Nafisa Mo‘minova ana shunday o‘rganishlardan
birini tuman Kengashi kotibiyati mutasaddilari bilan hamkorlikda amalga oshirdi. 

O‘rganish doirasida “Qiziloy” mahalla
fuqarolar yig‘ini hududida joylashgan 27-sonli davlat maktabgacha ta’lim tashkilotining
faoliyati yaqindan ko‘zdan kechirildi. Muassasaning moddiy-texnik bazasi, tarbiya
jarayoni, bolalar uchun yaratilgan shart-sharoitlar, sanitariya-gigiena talablariga
rioya etilishi hamda ta’lim-tarbiya sifati atroflicha tahlil qilindi. 

O‘rganish jarayonida muassasa faoliyatida
mavjud ayrim muammolar aniqlanib, ularning kelib chiqish sabablari va bartaraf etish
yo‘llari muhokama qilindi. Deputat tomonidan ushbu masalalarni tizimli hal etish,
maktabgacha ta’lim sifatini oshirish hamda bolalar uchun yanada qulay muhit yaratish
yuzasidan tegishli takliflar bildirildi. 

Aniqlangan kamchiliklarni bartaraf etish
maqsadida deputat Nafisa Mo‘minova tomonidan tuman maktabgacha ta’lim va maktab
bo‘limi rahbariga deputatlik so‘rovi yuborildi. Unda mavjud muammolarni qisqa muddatlarda
hal etish, muassasa faoliyatini yanada takomillashtirish bo‘yicha aniq chora-tadbirlar
ko‘rish zarurligi qayd etilgan. 

Ta’kidlash joizki, bunday o‘rganishlar
maktabgacha ta’lim tizimidagi muammolarni joyida aniqlash va tezkor hal etish imkonini
beradi. Eng muhimi, bu kabi deputatlik nazorati bolalarga sifatli ta’lim va munosib
sharoit yaratish, kelajak avlod tarbiyasiga munosib hissa qo‘shishda muhim ahamiyat
kasb etadi.