AYDÍN JOLLAR ULLÍ MAQSETKE JETELEYDI

Ózbekstan Respublikası mámleketlik ǵárezsizliginiń 35 jıllıǵı - xalqımızdıń erisken jetiskenlikleri, dóretiwshilik hám rawajlanıw jolın jáne de bekkemlemekte.
Ǵárezsizlik jıllarında elimizde ekonomika, bilimlendiriw, densawlıqtı saqlaw, infrastruktura, isbilermenlik hám sociallıq tarawlarda keń kólemli reformalar ámelge asırıldı. Mine, usınday jańalanıwlar xalqımız turmısında óz sáwleleniwin taptı.
Búgingi kúnde birǵana Berdaq awıl puqaralar jıyını mısalında xalıqtıń jasaw sharayatın jaqsılaw hám aymaqtı social-ekonomikalıq rawajlandırıw baǵdarında bir qansha ibratlı jumıslardı maqtanısh penen tilge alamız. Aldın "Berdaq" APJ aymaǵındaǵı Kepe awılı ishki jolınıń jaǵdayı xalıq hám transport qurallarınıń háreketi ushın bir qatar qolaysızlıqlardı keltirip shıǵaratuǵın edi. Ásirese, jol qaplamasınıń jaǵdayı puqaralardıń kúndelikli qatnawına unamsız tásir kórsetetuǵın edi.
Xalıqqa qolaylıq jaratıw maqsetinde Kepe awılı ishki jolınıń 0-2 km bólegine qara qaplamalı asfalt tósew jumısları juwmaqlandı. Joybardıń ulıwma bahası 1 mlrd 643,3 mln sumdı qurap, qurılıs jumısları "BATIRBEK ABDULLAEV" JShJ tárepinen ámelge asırıldı. Sonday-aq, bir ǵana usı jılda aymaqta 1,6 kilometr ishki jollar jańalandı.
    Aldın "Berdaq" APJ aymaǵındaǵı Qaraqalpaqstan, Bulaq hám Bulaq-1 kósheleriniń jol qaplaması xalıq hám avtotransport qurallarınıń háreketi ushın jeterli dárejede qolaylı emes edi.
    Xalıqqa qolaylıq jaratıw maqsetinde jámi 1,6 kilometr, sonnan Qaraqalpaqstan kóshesiniń 1 kilometri, Bulaq kóshesiniń 0,3 kilometri hám Bulaq-1 kóshesiniń 0,3 kilometrine qara qaplamalı asfalt tóseldi.
Joybardıń shártnama bahası 1 mlrd 558 mln sumdı qurap, qurılıs jumısları "ARAL YOL QURILISH" JShJ tárepinen ámelge asırıldı. Házirgi waqıtta qurılıs jumısları tolıq juwmaqlanǵan. Bul jumıslardıń bárshesi insan qádiri, xalıqtıń abadanlıǵı ushın baǵdarlanǵanı menen áhmiyetli sanaladı.

G.MINAJATDINOVA,
Xalıq deputatları Qaraózek rayonlıq Keńesi 8-Mańǵıtjarǵan okrugi deputatı, Ózbekstan Ekologiyalıq partiyası deputatlıq toparı aǵzası.