O‘rganish jarayonida deputatlar Termiz–Sariosiyo yo‘nalishida qatnovchi poyezd vagonlarida bo‘lib, yo‘lovchilar uchun yaratilgan qulayliklar, vagonlarning sanitariya holati, tozaligi, yo‘lovchilarga xizmat ko‘rsatish sifati va xavfsizlik masalalariga alohida e’tibor qaratdilar.
Shuningdek, poyezdda yo‘lovchilar bilan suhbatlashilib, ularning safar davomida yaratilgan sharoitlardan mamnunligi, mavjud muammolari va takliflari o‘rganildi.
Fuqarolarning murojaatlari va fikr-mulohazalari deputatlar tomonidan tinglanib, ularni tegishli mas’ullarga yetkazish hamda amaliy choralar ko‘rish bo‘yicha fikrlar bildirildi.
Deputatlar tomonidan vokzal hududidagi yo‘lovchilar uchun kutish joylari, axborot va xizmat ko‘rsatish tizimi, tartib-intizom hamda yo‘lovchilarga qulay shart-sharoit yaratish borasidagi ishlar ham ko‘zdan kechirildi.
Bunday nazorat va o‘rganishlar aholiga ko‘rsatilayotgan transport xizmatlari sifatini oshirish, yo‘lovchilarning qonuniy manfaatlarini himoya qilish, mavjud kamchiliklarni o‘z vaqtida aniqlash va bartaraf etishda muhim ahamiyat kasb etadi.