Bandixon tumanida deputatlik nazorati: Elektr tarmoqlari korxonasining kuz-qish mavsumiga shayligi tahlil qilindi

Bandixon tumanida yoqilg‘i-energetika sohasini bo‘lajak kuz-qish mavsumiga puxta tayyorlash, elektr ta’minoti barqarorligini ta’minlash va mavjud infratuzilmani soz holatga keltirish borasida tizimli deputatlik nazorati olib borilmoqda.

Xalq deputatlari Bandixon tumani Kengashi kotibiyati mudiri, deputat A.Pardayev tuman Elektr tarmoqlari korxonasida bo‘lib, o‘rganish ishlarini amalga oshirdi.

Monitoring jarayonida elektr tarmoqlari va transformator punktlarini joriy hamda kapital ta’mirlash reja-topshiriqlarining amaldagi ijrosi, korxonada yaratilgan avariyaviy moddiy-texnik zaxiralar, tezkor avariya-tiklash brigadalarining mavsumga shaylik holati ko‘rib chiqildi.

Shuningdek, xizmat ko‘rsatish jarayonlarida shaffoflikni ta’minlash va fuqarolar murojaatlari bilan ishlash samaradorligi tahlil etildi.

Tashrif yakunida aniqlangan kamchiliklarni bartaraf etish, elektr energiyasi ta’minotidagi yuklamalarni me’yorlashtirish va qish mavsumini uzluksiz ta’minot bilan o‘tkazish yuzasidan mas’ullarga tegishli vazifalar yuklatildi.