ТАЪЛИМ СИФАТИ ВА ЎҚУВЧИЛАР УЧУН ЯРАТИЛГАН ШАРОИТЛАР — ДЕПУТАТЛИК НАЗОРАТИДА
Халқ депутатлари Янгиқўрғон тумани Кенгашининг ҳафталик иш режаси ижросини таъминлаш, таълим муассасаларида ўқувчилар учун яратилган шарт-шароитларни ўрганиш ҳамда куз-қиш мавсумига тайёргарлик ҳолатини назорат қилиш мақсадида 23-Ровут сайлов округидан сайланган депутат Тошпўлатов Олимжон Юлдашевич томонидан округ ҳудудида жойлашган 3-сонли умумий ўрта таълим мактабида ўрганиш ишлари олиб борилди.
Депутат дастлаб мактаб маъмурияти ва масъул ходимлар билан суҳбатлашиб, таълим-тарбия жараёнининг ташкил этилиши, ўқувчилар давомати, улар учун яратилган шароитлар ҳамда муассасадаги мавжуд эҳтиёжлар ҳақида маълумот олди.
Ўрганиш жараёнида мактабнинг синф хоналари, йўлаклари, иситиш хоналари ва бошқа зарур жойлари кўздан кечирилди. Хусусан:
🔹 ўқувчиларнинг сифатли таълим олиши учун яратилган шароитлар;
🔹 синф хоналарининг ҳолати ва уларнинг зарур жиҳозлар билан таъминланганлиги;
🔹 хоналарда санитария-гигиена талабларига риоя этилиши;
🔹 ўқувчилар учун хавфсиз ва қулай муҳит яратилганлиги;
🔹 куз-қиш мавсумига тайёргарлик даражаси;
🔹 иситиш тизимлари ва қозонхонанинг техник ҳолати;
🔹 мавсум давомида зарур бўладиган кўмир захирасининг мавжудлиги;
🔹 ёнғин ва техника хавфсизлиги талабларига риоя этилиши атрофлича ўрганилди.
Шунингдек, совуқ кунларда синф хоналарида меъёрий ҳароратни таъминлаш, иситиш тизимларининг узлуксиз ишлашини назорат қилиш, мавжуд кўмир захирасидан белгиланган тартибда самарали фойдаланиш ҳамда ўқувчиларнинг хавфсизлигини таъминлаш масалаларига алоҳида эътибор қаратилди.
Мактаб маъмурияти билан мулоқот давомида таълим муассасасидаги мавжуд муаммолар, уларни ҳал этиш имкониятлари ва масъул ташкилотлар билан ҳамкорликда амалга оширилиши лозим бўлган чора-тадбирлар муҳокама қилинди.
Ўрганиш якунлари бўйича таълим жараёнини янада сифатли ташкил этиш, ўқувчилар учун муносиб шарт-шароитларни таъминлаш ва куз-қиш мавсумини беталафот ўтказиш юзасидан тегишли тавсиялар берилди. Назорат давомида кўтарилган масалаларнинг ижроси депутатлик назоратига олинди.