ЯНГИҚЎРҒОН ТУМАНИ КЕНГАШИНИНГ ИЖТИМОИЙ ТАРМОҚЛАРДАГИ ФАОЛИЯТИ ТАҲЛИЛ ҚИЛИНДИ

Халқ депутатлари Наманган вилояти Кенгаши котибияти мудири Т.Гаппаров бошчилигида Янгиқўрғон тумани Кенгашининг 2026 йил 3–8 август кунларидаги ижтимоий тармоқлардаги фаолияти таҳлил қилинди.
Таҳлил даврида туман Кенгашининг расмий Telegram канали орқали жами 104 та материал эълон қилинган. Шундан 61 таси депутатлар фаолиятига бағишланган бўлиб, бу Кенгаш фаолиятини жамоатчиликка етказишда депутатлик корпусига алоҳида эътибор қаратилганини кўрсатади.
Ҳисобот даврида жами 10 нафар депутатнинг фаолияти ижтимоий тармоқларда ёритилган. Жумладан, туман ҳокими А.Нажмиддиновнинг фаолияти 15 маротаба, Р.Миразимовники 6 маротаба, М.Садриддинов ва К.Бўтаевларники 3 маротабадан, О.Тошпўлатов, А.Ашуров ва Л.Араловларники 2 маротабадан, Т.Юлдашев ва Ж.Ёқубжановларники 1 маротабадан ёритилган. Котибият мудири М.Эргашеванинг фаолияти эса 12 маротаба акс эттирилган.
Шу билан бирга, депутатлар фаолиятини ёритишда мутаносибликни таъминлаш, ижтимоий тармоқларда фаолияти акс этмаётган депутатларнинг ишини ҳам мунтазам ёритиб бориш зарурлиги қайд этилди.
Депутатлик назорати йўналишида 4 та депутатлик сўрови ва 1 та сўровга берилган жавоб ёритилган. Х.Абудуллаевнинг депутатлик сўрови натижасида Кўкёр маҳалласи Муғол кўчасида ичимлик суви тармоғини тортиш ишлари бошлангани ҳақида материал берилгани депутатлик сўровининг аниқ амалий натижаси сифатида ижобий баҳоланди.
Шунингдек, Ф.Отабоев ва К.Бўтаев томонидан ҳудудларда ўтказилган кўчама-кўча ўрганишларда аниқланган муаммоларнинг депутат дафтарига қайд этилгани бўйича 2 та материал эълон қилинган. Бироқ айрим ўрганишлар бўйича аниқланган муаммоларнинг депутат дафтарига қайд этилгани ва уларнинг кейинги ижроси ҳақида маълумотлар тўлиқ ёритилмаган.
Туман Кенгаши сессиясини YouTube орқали тўлиқ жонли эфирда намойиш этилгани ҳам ижобий амалиёт сифатида қайд этилди.
Таҳлил жараёнида айрим материалларда жараён ёритилган бўлса-да, якуний натижа очиб берилмагани аниқланди. Хусусан, 4-сонли сайлов округи депутати Ж.Ёқубжанов фаолиятига оид материалларда амалга оширилган ишлар ва эришилган натижалар етарлича кўрсатилмаган. Шу муносабат билан ҳар бир ўрганиш ва ташаббусда муаммо, кўрилган чора ва аниқ натижани биргаликда ёритиш мақсадга мувофиқлиги таъкидланди.
Умуман, Янгиқўрғон тумани Кенгашининг ижтимоий тармоқлардаги фаолиятида материаллар сони ва депутатлик фаолиятига ажратилган контент салмоғи юқори экани, сессияларни жонли эфирда намойиш этиш, депутатлик сўровлари ва уларнинг натижаларини ёритиш, депутат дафтарига қайдларни акс эттириш каби ижобий амалиётлар шакллангани қайд этилди.
Шу билан бирга, депутатлар қамровини кенгайтириш, депутатлик сўровларига берилган жавоблар ва уларнинг амалий натижаларини мунтазам ёритиш, доимий комиссиялар фаолияти ҳамда ҳар бир ўрганишнинг якуний натижаларини жамоатчиликка етказиш бўйича тегишли тавсиялар берилди.