Xalq deputatlari Boyovut tumani Kengashi deputati, Mahalliy byudjet, tadbirkorlikni rivojlantirish va iqtisodiy islohotlar bo‘yicha doimiy komissiyasi a'zosi A.Bo‘tayev hamda Kengash kotibiyati mutaxassisi Sh.Suvankulov tomonidan O‘zbekiston Respublikasining "Mahalliy davlat hokimiyati to‘g‘risida"gi Qonunining 19¹-moddasi talablariga muvofiq saylov hududidagi Navro‘z mahallasida amalga oshirilayotgan qurilish ishlari deputatlik nazorati tartibida o‘rganildi.

O‘rganish davomida 31-son maktabgacha ta’lim tashkilotining eski binosi o‘rnida 120 o‘rinli zamonaviy maktabgacha ta’lim tashkiloti binosini rekonstruksiya qilish loyihasining amalga oshirilish jarayoni bilan tanishildi.

Mazkur obyektning buyurtmachisi "Sirdaryo viloyati" Yagona buyurtmachi xizmati, loyiha tashkiloti "Best Geo Maps", pudratchi esa "Sunny Lend Service" MChJ hisoblanadi.

Qurilish ishlari 2026-yil 14-iyul sanasida boshlangan bo‘lib, obyektni 2026-yil 17-oktabr kuni foydalanishga topshirish rejalashtirilgan. Loyihaning umumiy qiymati 4 milliard 501 million 562 ming 508 so‘mni tashkil etadi.

O‘rganish davomida qurilish ishlarining loyiha hujjatlariga muvofiq olib borilishi, ishlar sifati hamda obyektni belgilangan muddatda foydalanishga topshirish masalalariga alohida e’tibor qaratildi.