Xalq deputatlari Chilonzor tumani Kengashining III-22-66-14-204-K/26-son qaroriga muvofiq, Chilonzor tumanida "Dolzarb 90 kun" loyihasi doirasida yoshlarning bo‘sh vaqtini mazmunli tashkil etish, ularning bilim va ko‘nikmalarini rivojlantirish hamda zamonaviy kasbiy kompetensiyalarini oshirishga qaratilgan qator amaliy tadbirlar izchil amalga oshirilmoqda.

Mazkur loyiha doirasida iyul–avgust oylarida "Tez yoz" chempionati tashkil etiladi.

Chempionatning asosiy maqsadi ishtirokchilarning o‘zbek va ingliz tillarida kompyuter klaviaturasida tez, aniq va bexato yozish ko‘nikmalarini rivojlantirish, raqamli texnologiyalardan samarali foydalanish madaniyatini shakllantirish, raqamli savodxonlik darajasini oshirish hamda iqtidorli va faol yoshlarni aniqlash va qo‘llab-quvvatlashdan iborat.

Musobaqa davomida ishtirokchilar maxsus topshiriqlar asosida matnlarni belgilangan vaqt ichida maksimal tezlik va aniqlik bilan terish bo‘yicha o‘z mahoratlarini namoyish etadilar. G‘olib va sovrindorlar munosib taqdirlanadi.

"Tez yoz" chempionati yoshlarning axborot-kommunikatsiya texnologiyalaridan samarali foydalanish, zamonaviy kasbiy ko‘nikmalarni egallash va o‘z salohiyatini namoyon etishi uchun muhim maydon bo‘lib xizmat qiladi.