Xalq deputatlari Bo‘stonliq tumani Kengashining 2026-yilga mo‘ljallangan Ish rejasiga muvofiq O‘zbekiston Xalq demokratik partiyasidan saylangan deputat S.Madjitov tomonidan tumanning “Kichiksoy” mahallasida joylashgan “Bo‘stonliq-Farm” erkin iqtisodiy zonasida joylashgan ishlab chiqarish loyihalarning internet aloqa tizimiga ulanganlik holati hamda ishchi xodimlarning xizmat xonalarida isitish va sovitish tizimlari sifati o‘rganildi.

O‘rganish davomida korxonalarning barqaror faoliyatini ta’minlashda muhim ahamiyatga ega bo‘lgan internet aloqa tizimining ishlash holati atroflicha tahlil qilinib, ishlab chiqarish jarayonlarida raqamli texnologiyalardan samarali foydalanish, elektron hujjat aylanishi, axborot tizimlarining uzluksiz ishlashi hamda yuqori tezlikdagi internet tarmog‘iga ulanganlik darajasi ko‘zdan kechirildi.

Shuningdek, ishchi-xodimlar uchun yaratilgan mehnat sharoitlari ham alohida e’tibor markazida bo‘ldi. Xizmat xonalaridagi isitish va sovitish tizimlarining texnik holati, ularning mavsum talablariga mosligi, ishchi xodimlar uchun qulay mehnat muhitini ta’minlash darajasi o‘rganildi. Xonalarning harorat rejimi, ventilyatsiya tizimlari va konditsionerlarning ishlash samaradorligi yuzasidan mas’ullarga tegishli tavsiyalar berildi.