Oliy Majlis Senati devonining Hududiy vakillik organlari faoliyatini oʻrganish markazi tomonidan Buxoro, Navoiy, Xorazm, Toshkent, Surxondaryo va Qashqadaryo viloyatlarida mahalliy Kengashlar faoliyatini oʻrganish yakunlari yuzasidan onlayn seminar oʻtkazildi.

Senatning 2026-yil 14-iyuldagi 22-06/2877-sonli xatiga muvofiq, mazkur seminarda Xalq deputatlari Mirzo Ulug‘bek tumani Kengashi raisi M.Yuldasheva, Kengash kotibiyati mudiri Sh.Shomaxmudov, Kengashning Mahalliy budjet, tadbirkorlikni rivojlantirish va iqtisodiy islohotlarni amalga oshirish masalalari bo‘yicha doimiy komissiyasi raisi B.Nurmatov va kotibiyat bosh mutaxassisi J.Kuchkarov ishtirok etishdi.

Seminar davomida shunchaki hisobotlar emas, balki hududlarda oʻtkazilgan monitoring jarayonida aniqlangan tizimli kamchiliklar va ularning huquqiy oqibatlari atroflicha tahlil qilindi:

Mahalliy Kengashlar tomonidan qabul qilinayotgan ayrim qarorlarning amaldagi qonunchilik hujjatlariga nomuvofiqligi, vakolat doirasidan chetga chiqish holatlari koʻrsatib oʻtildi.

Qarorlarni loyihalashda yuridik-texnik talablarga toʻliq rioya etilmasligi, bandlarning noaniq yoki ikki xil maʼnoni anglatuvchi tarzda shakllantirilishi tanqid qilindi.

Normativ ahamiyatga ega qaror loyihalarini adliya bo‘limi tomonidan beriladigan ekspirtiza xulosasiga asosan tasdiqlanishi to‘g‘risida tushuntirish berildi.

Oliy Majlis Senati tomonidan tashkil etilgan mazkur tahliliy seminar Mirzo Ulug‘bek tumani Kengashi kotibiyati vakillari uchun amaliy dars vazifasini oʻtadi.

Seminarda oʻrtaga tashlangan tanqidiy tahlillar va monitoring natijalaridan kelib chiqib, kotibiyat tomonidan muhim xulosalar va kelgusidagi ustuvor vazifalar belgilab olindi.