Deputatlar va ekspertlar joylarda: PF-209-sonli farmon ijrosi Uzun tumanida o‘rganilmoqda

Xalq deputatlari Uzun tumani Kengashining navbatdagi sessiyasi kun tartibiga kiritilgan muhim masala yuzasidan amaliy ishlar boshlab yuborildi.

Ishchi guruh a’zolari qog‘ozdagi hisobotlar bilan cheklanib qolmay, masalani tubdan va xolis o‘rganish uchun bevosita joylarga chiqishmoqda.

Xususan, O‘zbekiston Respublikasi Prezidentining PF-209-sonli Farmoni ijrosini ta’minlash, tuman budjetini shakllantirish hamda mahallalar infratuzilmasini yaxshilash maqsadida xalq deputatlari tuman Kengashi ishchi guruhi va soha ekspertlari “Yangi hayot” mahalla fuqarolar yig‘inida (MFY) bo‘lishdi.

Ishchi guruh tomonidan “Yangi hayot” MFYda farmon talablaridan kelib chiqib, 10 foizlik soliq tushumlarining shakllanishi va yo‘naltirilishi holati batafsil tahlil qilindi.

O‘rganish davomida aniqlangan raqamlar, mavjud imkoniyatlar va kamchiliklar ekspertlar bilan birgalikda muhokama qilindi.

Joyida o‘rganilgan ushbu tahliliy ma’lumotlar va tegishli xulosalar xalq deputatlari Uzun tumani Kengashining navbatdagi sessiyasida deputatlar e’tiboriga havola etiladi va unda yakuniy qaror qabul qilinadi.