Bu borada xalq deputatlari mahalliy Kengashlari deputatlari tomonidan olib borilayotgan o‘rganishlar muhim ahamiyat kasb etmoqda.

O‘zbekiston Respublikasi Prezidentining PQ-406-son qarori, Senat Kengashining KQ-35-V-son qarori ijrosini ta’minlash hamda mahalliy Kengash deputati faoliyatining eng muhim yo‘nalishlari bo‘yicha belgilangan 24 ta tavsiyadan kelib chiqib, 14-Yuksalish saylov okrugi deputati Jurayeva Saodatxon Xashimovna o‘z saylov okrugidagi “Fayzlimetall” MCHJ faoliyatini joyiga chiqqan holda o‘rgandi.
O‘rganish davomida korxonaning ishlab chiqarish jarayonlari, mavjud imkoniyatlari va istiqboldagi rivojlanish rejalari bilan yaqindan tanishildi. Ayni paytda korxonada zamonaviy “aqlli qozon”lar ishlab chiqarilib, 10 nafar fuqaro doimiy ish bilan ta’minlangan.

Korxona rahbariyati tomonidan ma’lum qilinishicha, ishlab chiqarish quvvatlarini yanada kengaytirish rejalashtirilgan. Xususan, qo‘shimcha 10 ta yangi ish o‘rni yaratish, Xitoy davlatidan zanglamaydigan metall (nerjaveyka) materiallarini olib kelish hamda metall to‘siqlar ishlab chiqarishni yo‘lga qo‘yish ko‘zda tutilgan.

Mazkur tashabbuslar nafaqat korxonaning iqtisodiy salohiyatini oshirishga, balki hududda bandlikni ta’minlash va mahalliy sanoatni rivojlantirishga ham xizmat qiladi. Yangi ishlab chiqarish yo‘nalishlarining yo‘lga qo‘yilishi ichki bozorni sifatli mahsulotlar bilan ta’minlash imkoniyatlarini kengaytirishi kutilmoqda.

O‘rganish jarayonida deputatga hokim yordamchisi hamrohlik qildi. Muloqot davomida tadbirkorlik subyektlari faoliyatini qo‘llab-quvvatlash, mavjud muammolarni bartaraf etish va investitsion loyihalarni rag‘batlantirish masalalari yuzasidan fikr almashildi.
Bunday o‘rganishlar hududlarda amalga oshirilayotgan islohotlar samaradorligini oshirish, tadbirkorlarning faoliyatini qo‘llab-quvvatlash hamda aholi bandligini ta’minlashga qaratilgan amaliy ishlarning muhim qismi hisoblanadi.