Bolalar uchun xavfsiz va qulay muhit yaratish, ularning sog‘lig‘i hamda qonuniy manfaatlarini himoya qilish muhim vazifalardan biridir. Shu nuqtayi nazardan, mahallalarda bolalar maydonchalari holatini o‘rganish, mavjud muammolarni aniqlash va ularni bartaraf etish yuzasidan tegishli choralar ko‘rilishini nazorat qilish deputatlik faoliyatining muhim yo‘nalishlaridan hisoblanadi.

O‘zbekiston Respublikasining 2008-yil 7-yanvardagi O‘RQ–139-son “Bola huquqlarining kafolatlari to‘g‘risida”gi Qonuni ijrosini ta’minlash, shuningdek, Prezidentning PQ–406-son qarori, Oliy Majlis Senati Kengashining KQ–35-V-son qarori hamda mahalliy Kengash deputati faoliyatining eng muhim yo‘nalishlari bo‘yicha belgilangan 24 ta tavsiya ijrosi doirasida Yo‘rmado‘z mahallasidagi bolalar maydonchasi holati o‘rganildi.

O‘rganishda Xalq deputatlari Marg‘ilon shahar Kengashi kotibiyati mudiri A.Ermatov, deputat Z.G‘ofurova, kotibiyat bosh mutaxassisi N.Akbarova, mahalla raisi G‘.Djumaboyev hamda yoshlar yetakchisi A.Akbarov ishtirok etdilar.

O‘rganish davomida bolalar maydonchasida ularning mazmunli hordiq chiqarishi va xavfsiz dam olishi uchun yaratilgan sharoitlar ko‘zdan kechirildi. Jarayonda maydoncha atrofida suv tarmog‘i tortilgani, biroq uni qurish ishlari hali yakuniga yetkazilmagani aniqlandi.

Qurilish ishlarining oxiriga yetkazilmagani hududdan foydalanish uchun zarur sharoitlarni to‘liq ta’minlash masalasiga alohida e’tibor qaratishni talab etadi. Shu bois aniqlangan kamchilikni bartaraf etish va tegishli ishlarni yakunlash masalasi deputatlik nazoratiga olindi.

O‘rganish yakunlari bo‘yicha mavjud muammoni hal etish hamda bolalar maydonchasida qulay va xavfsiz muhitni ta’minlash yuzasidan tegishli choralar ko‘rilishi nazoratga olindi.

Deputatlik nazoratining asosiy maqsadi — hududlarda mavjud muammolarni aniqlash bilangina cheklanmay, ularning amaliy yechimiga erishish va bolalar uchun munosib sharoitlar yaratilishiga ko‘maklashishdir.