Xalq deputatlari Qo‘qon shahar Kengashi deputati Z. Madaminova tomonidan 2-“Avg‘onbog‘” saylov okrugi hududidagi “Avg‘onbog‘” mahalla fuqarolar yig‘inida o‘rganish ishlari olib borildi.

O‘rganish davomida mahallaning Bobobek ko‘chasi, 108-uyda istiqomat qiluvchi, Ijtimoiy reyestrga kiritilgan fuqaro K. Tursunbayeva xonadoniga tashrif buyurildi. Tashrif chog‘ida oilaning yashash sharoiti, mavjud ehtiyojlari hamda ijtimoiy qo‘llab-quvvatlash borasida amalga oshirilgan ishlar bilan tanishildi.

Ma’lum qilinishicha, fuqaroga tadbirkorlik faoliyatini yo‘lga qo‘yish va o‘zini o‘zi band qilish orqali daromad manbaiga ega bo‘lishi uchun 20 million 600 ming so‘m miqdorida subsidiya ajratilgan.

Shuningdek, oilaga “Saxovat va ko‘mak” jamg‘armasi tomonidan ham yordam ko‘rsatilgani aniqlandi. Jumladan, vaucher asosida oziq-ovqat va kiyim-kechak mahsulotlarini xarid qilish uchun moddiy ko‘mak ajratilgan.

Bunday o‘rganishlar aholining ehtiyojmand qatlamini qo‘llab-quvvatlash, oilalarning turmush sharoitini yaxshilash hamda fuqarolarning bandligini ta’minlash orqali ularning farovonligini oshirishga xizmat qiladi.

Xalq deputatlari Qo‘qon shahar Kengashi