SHAXSIY QABULDA FUQAROLAR MUROJAATLARI YUZASIDAN ANIQ CHORA-TADBIRLAR BELGILANDI

Namangan shahar hokimligi tomonidan O‘zbekiston Respublikasi Prezidenti Xalq qabulxonasining Namangan shahar bo‘limida navbatdagi shaxsiy qabul tashkil etildi.

Qabul davomida Namangan shahar hokimi, Xalq deputatlari Namangan shahar Kengashi deputati Ayubxon Kamalov 57 nafar fuqaroning murojaatlari, muammo va takliflarini atroflicha tingladi. Murojaatlarning 21 tasi qabul jarayonining o‘zida tegishli mas’ullar ishtirokida ijobiy hal etildi.

Bajarilishi muayyan vaqt talab etadigan hamda qo‘shimcha o‘rganishni taqozo qiladigan murojaatlar tegishli tashkilot va idoralarga yo‘naltirildi. 

Ularni qonunchilik talablari asosida ko‘rib chiqish va yechim topish yuzasidan mas’ullarga aniq vazifalar belgilab berildi.

Bunday shaxsiy qabullar aholi bilan ochiq muloqotni yo‘lga qo‘yish, fuqarolarni qiynayotgan masalalarni imkon qadar joyida hal etish hamda davlat organlarining xalq oldidagi mas’uliyatini yanada oshirishga xizmat qiladi.