O‘zbekiston Respublikasi Prezidentining PQ–406-son qarori, Oliy Majlis Senati Kengashining KQ–35-V-son qarori hamda mahalliy Kengash deputati faoliyatining eng muhim yo‘nalishlari bo‘yicha belgilangan 24 ta tavsiya ijrosi doirasida Marg‘ilon shahrida deputatlik nazorati tadbirlari davom ettirilmoqda.

Navbatdagi o‘rganish Xalq deputatlari Marg‘ilon shahar Kengashi kotibiyat mudiri A.Ermatov, “Korrupsiyaga qarshi kurashish va xavfsizlik masalalari” doimiy komissiyasi raisi X.Abdurahmonov tomonidan 2-Saxovat saylov okrugi deputati S. Azizov hududidagi Saxovat MFY, Burxoniddin Marg‘iloniy ko‘chasi, 63-uyda joylashgan 5-oilaviy poliklinikada amalga oshirilayotgan qurilish-ta’mirlash ishlari holati ko‘zdan kechirildi.

Mazkur poliklinika “Open Budget” (“Ochiq budjet”) loyihasining 2026-yil 1-mavsumida g‘olib bo‘lgan obyektlardan biri hisoblanadi. Loyiha doirasida tibbiyot muassasasini mukammal ta’mirlash va aholi uchun yanada qulay shart-sharoitlar yaratish ko‘zda tutilgan.

Ma’lumotlarga ko‘ra, mazkur qurilishga 2026-yil 13-iyul kuni ruxsat berilgan. Buyurtmachi — “Farg‘ona viloyat hokimligi kapital qurilish sohasida buyurtmachi xizmati” davlat muassasasi, loyihachi — “FOZILJON PROJECT BUILDINGS” MChJ, pudrat tashkiloti esa “SBR STROY REPAIR” MChJ hisoblanadi.

Joyiga chiqib o‘rganish davomida qurilish-ta’mirlash ishlarining borishi, belgilangan vazifalarning ijrosi va obyektning foydalanishga tayyorlanish jarayoniga alohida e’tibor qaratildi.

O‘rganish davomida obyektdagi yog‘och qismlariga yong‘inni susaytiruvchi kimyoviy ishlov berish ishlari hali amalga oshirilmagani ham aniqlandi. Mazkur ishlarni belgilangan talablar asosida o‘z vaqtida bajarish, obyektning yong‘in xavfsizligini ta’minlash va tegishli chora-tadbirlarni ko‘rish zarurligi qayd etildi.

Deputatlik nazorati doirasidagi bunday o‘rganishlardan asosiy maqsad hududlarda amalga oshirilayotgan loyihalarning samaradorligini ta’minlash, ajratilayotgan mablag‘lardan oqilona foydalanilishini nazorat qilish hamda aholiga ko‘rsatilayotgan tibbiy xizmatlar uchun munosib sharoit yaratishdan iborat.

Xalq deputatlari Marg‘ilon shahar Kengashi tomonidan mazkur obyekt bo‘yicha ishlarning borishi va loyiha ijrosi deputatlik nazorati asosida kuzatib boriladi.