Xalıq penen ashıq múnásibette islew, olardıń múrájatların waqtında kórip shıǵıw hám máselelerge ámeliy sheshim tabıw búgingi kúnde eń áhmiyetli wazıypalardan
biri esaplanadı.  

Ásirese, xalıqtı taza ishimlik suw menen támiyinlew máselesi boyınsha alıp barılıp atırǵan jumıslar puqaralar tárepinen joqarı bahalanbaqta. 

Kóp jıllardan beri puqaralar tárepinen kóterilip kelgen máselelerdiń biri – Bozataw rayonı “Qusqanataw” APJ Ótemis awılındaǵı shańaraqlardı ishimlik suw tarmaǵına jalǵaw edi. Búgingi kúnde bul másele óziniń ámeliy sheshimin tawıp, “Qaraqalpaq suw támiynatı” mákemesi tárepinen qáwenderlik еsаbınan 3,5 km uzınlıqta 34 puqaranıń úylerine suw tarmaqları tartılıp berildi.
Usı múnásibet penen Xalıq deputatları Bozataw rayonlıq Keńesi sekretariatı baslıǵı A.Ibragimov hám 6-Andjan saylaw okruginen (XDP) saylanǵan deputat Sh.Berdaxovlar aymaqqa barıp, alıp barılıp atırǵan qurılıs-montaj jumısların kózden ótkerdi. Jumıslar sapalı hám belgilengen rejeler tiykarında alıp barılıp atırǵanlıǵı atap ótildi.
Máselelerdi orında úyreniw barısında awıl turǵınları menen sáwbetlesiwler ótkerilip, olardıń pikir-usınısları tıńlandı. Puqaralar ózleriniń kóp jıllıq múrájatı sheshim tapqanlıǵınan razı ekenliklerin bildirip, bul jumıslarǵa úles qosqan deputatlar hám juwapker shaxslarǵa óz minnetdarshılıǵın bildirdi.
Bunday ámeliy jumıslar xalıqtıń turmıs sapasın jaqsılawǵa, infrastrukturanı rawajlandırıwǵa hám puqaralardıń turmıslıq qolaylıqların arttırıwǵa xızmet etedi. Keleshikte de aymaqlarda puqaralar múrájatların sheshiwge qaratılǵan jumıslar izbe-iz dawam ettiriledi.